Parlament Májilisiniń depýtaty Erjan Qudaıbergen kelesi shaqyrylymǵa óz kandıdatýrasyn usyný úshin "Nur Otan" praımerıziniń kelesi deńgeıi – óńirlik konferensııalar aıasyndaǵy debattarǵa qatysýǵa sheshim qabyldady, dep habarlaıdy Egemen.kz.
17 qarashada Túrkistan oblysynda partııanyń óńirlik konferensııasy ótedi. Onda úmitkerler arasyndaǵy debattardan soń oblystyq máslıhatqa partııalyq tizim jáne Parlament Májilisine partııalyq tizimge enýge kandıdattar aıqyndalady. Erjan Qudaıbergen osy pikirtalastarǵa qatysyp, óz kandıdatýrasyn usynbaq.
"Men elimizde alǵash ret respýblıkalyq deńgeıde ótken partııalyq praımerızdi muqııat baqyladym. Árıne, meni partııaishilik saılaýǵa qatysýshylar arasynda jastardyń kóp bolýy qýantady. Jastar kóptegen jańa ıdeıalar men ózgeristerge jańa kózqaras ákeledi. Alaıda qazirgi álemdik saıası tájirıbede memleket qaıratkeri memlekettik basqarý isine qajetti kóptegen daǵdylarǵa ıe bolýy kerek. Ol ózin kópshilik aldynda kórsete bilip, senimdi sóılep, óz óńiriniń problemalary týraly ǵana emes, halyqaralyq qarym-qatynas jáne ulttyq qaýipsizdik máselelerin taldaı bilýi, sondaı-aq durys, ózekti sheshimder usyna alýy tıis.
Bizdiń otandastarymyz bul jaǵynan qalys qalyp jatqan joq. Olar zamanaýı bilim alady, al keıbireýleri "Bolashaq" baǵdarlamasy boıynsha úzdik sheteldik joǵary oqý oryndarynda oqyp, zamanaýı tehnologııalardy jaqsy meńgergen jáne óte kreatıvti. Biraq soǵan qaramastan, bir jetispeıtin nárse bar – tájirıbe. Ol jyldar boıy jınaqtalyp, damyp otyrady. Osy oraıda jastar men jańa saıası tulǵalarǵa partııanyń tájirıbeli músheleriniń, tálimgerlerdiń kómegi men qoldaýy artyq bolmas.
Naqty saıasatta aýhal praımerız aıasyndaǵydaı emes. Qarsy taraptyń pikirin estı bilý, jalpy máseleniń túpki mánin tabý men utymdy sheshim usyna bilý – bul óte mańyzdy. Obektıvti túrde aıtsaq, bilimi men energııasy bar jastar túrli qordalanǵan máselelerden turatyn "taý-tastardy" qopara alar, biraq bul "qoparýlardan" keıingi is-qımyl oń baǵyt alýy qajet", - dedi ol.
Búginde Parlament Májilisiniń depýtaty, Halyqaralyq ister, qorǵanys jáne qaýipsizdik komıtetiniń múshesi retinde Erjan Qudaıbergenge aýysymǵa kele jatqan jańa býynnyń deńgeıin bilý óte mańyzdy. Halyqaralyq qatynastar men ulttyq qaýipsizdik máseleleri tıisti biliktilik pen tájirıbeni talap etedi. Mysaly, QR Qarýly Kúshterin áskerı daıarlaý, jaraqtandyrý jáne olardyń bıýdjeti nemese Qazaqstannyń BUU, EQYU, TMD, DSU, UQShU jáne basqa da halyqaralyq uıymdardaǵy qyzmeti máselelerin talqylaý.
Onyń aıtýynsha, halyqaralyq qatynastar men ulttyq qaýipsizdiktiń mańyzdy máselelerimen tájirıbesi men bilimi bar azamattar aınalysýy kerek.
"Men depýtattyqqa túsken Túrkistan óńiriniń múddesin bildirýge jáne halyqaralyq qatynastardyń mańyzdy máselelerin sheshýge tájirıbem men kúsh-jigerim jetedi dep sanaımyn. Alda bizdi jaýapty jumystar kútip tur. Meniń bilimim men tájirıbem budan ári de paıdaly bolǵanyn qalaımyn", - dedi ol.