Qarabalyq kentindegi mádenıet saraıy kórermenderge lyq toldy. Eldiń aýzynan túspeıtin «juldyzdar» ónerin tamashalaıtyndaı, konsertke úlken-kishi qalmaı kelipti. Bul aýdan ortalyǵyndaǵy Kórkem Aıtbaeva basqaratyn №1 orta mekteptiń pedagogıkalyq ujymy, oqýshylar jáne ata-analar birlesip qoıatyn qaıyrymdylyq konserti bolatyn.
Qarabalyq kentindegi mádenıet saraıy kórermenderge lyq toldy. Eldiń aýzynan túspeıtin «juldyzdar» ónerin tamashalaıtyndaı, konsertke úlken-kishi qalmaı kelipti. Bul aýdan ortalyǵyndaǵy Kórkem Aıtbaeva basqaratyn №1 orta mekteptiń pedagogıkalyq ujymy, oqýshylar jáne ata-analar birlesip qoıatyn qaıyrymdylyq konserti bolatyn.
700 bılet satylǵan, onyń syrtynda mádenıet saraıynyń kire berisine qoıylǵan qaıyrymdylyq jáshigine jurtshylyq qolda baryn tastap jatyr. Eń bastysy, qaıyrymdylyq sharasy dese, aýdan ortalyǵynan bastap, alys, shalǵaıdaǵy aýyldar turǵyndaryna deıin tıyn-tebenin aıamaıdy. Osynyń barlyǵy da aýdan kólemindegi týmaı jatyp, taǵdyr tálkegin kórgen, aýrýdyń azabyn shekken búldirshin balalar úshin edi. Bir konserttiń ózinen qorǵa 150 myń teńge tústi.
Osydan tórt jyl buryn aýdandyq «Aına» gazetiniń redaktory, oblysqa belgili jýrnalıst, Qazaqstannyń qurmetti jýrnalısi Marııa Saparova «Meıirimdilik pen úmit» qaıyrymdylyq qoryn qurǵan bolatyn. San ulttyń ókilinen turatyn aýdan turǵyndary qordy birden qoldady. Gazet betinde únqosýlar kóbeıdi.
– Aýdanda naýqasy aýyr, múgedek 68 bala bar. Olardyń taǵdyry tek ata-anasynyń ǵana emes, búkil aýdan turǵyndarynyń júregin aýyrtatynyna ylǵı kózim jetip keledi. Biz aýrý bala týraly maqala jarııalaǵan kúnnen bastap kómegin usynǵan hattar kóbeıdi, telefon shalyp habarlasatyndar qanshama! Osyndaı qaıyrymdylyq iste adamdardyń eshqandaı ultqa, ulysqa bólinbeıtinine men ishteı shúkirshilik etemin. Tonnyń ishki baýyndaı adamdar burynǵydan da dostasyp, judyryqtaı birigip ketkendeı bolady, – deıdi Marııa Ábýtálipqyzy.
Tórt jyldyń ishinde qor birneshe balanyń Astanaǵa, Reseıge baryp, em alyp kelýine kómektesti. On eki jasar Aqjan Nurıevanyń júregi ishten aqaý bolyp týǵan. Oǵan bir emes, birneshe ret operasııa jasalýy kerek. Astana qalasyndaǵy Ana men bala ulttyq ǵylymı ortalyǵynda oǵan alǵashqy operasııa jasalǵanda, qarabalyqtyqtar 120 myń teńge jınap berdi.
– Ár balanyń aýyr halin estigende keıde túngi uıqym buzylady. Bárimiz de balanyń, nemereniń betine qarap otyrmyz. Aqjannyń júregine operasııa jasaýǵa Astanaǵa baratyn kezde nemeremdi ertip alyp, qorǵa 1 myń teńge ákelip tapsyrdym. Áńgime bergen aqshańnyń az-kóptiginde de emes shyǵar, bala táýir bolyp kelsin degen tilektestigimdi bildirip, yrymdap ákelip berdim, – deıdi Qarabalyq kentiniń turǵyny Iýlııa Fomenko. Bir Iýlııa Iаroslavovna emes, aýdandaǵy ár otbasy, ár adam aýrý balalar emdelýge attanǵan saıyn, az-kóptigine qaramaı, qolǵa túskenderin ózderi osylaı ákelip berip jatady.
Júrek aqaýynan zardap shegetin 8 jasar Nastıa Spenakıdi kardıologııalyq klınıkaǵa jiberý úshin ol turatyn shaǵyn Svıatoslav aýylynyń turǵyndary, «Qarabalyq» ǵylymı-tájirıbe sharýashylyǵynyń jumysshylary 80 myń teńge jınap berdi. Alty jasar Jenıa Syganovtyń taǵdyryna jazǵan mýkovıssıdoz aýrýy, dárigerlerdiń aıtýynsha, óte sırek kezdesedi eken. Bala onyń aýyr túrinen zardap shegedi. Astanadaǵy Ana men bala ulttyq ǵylymı ortalyǵyna baryp em alýy úshin oǵan qordan 100 myń teńge kómek berildi. Al 11 jasar Nastıa Andrııanestiń aýrýy júrek aqaýynyń bir túri – tetra-fallo dep atalady, ıaǵnı júregi oń jaǵyna ornalasqan. Onyń ústine qyz balany tek jalǵyz ájesi ǵana tárbıeleıdi. Aýdannyń bir túkpirindegi Stansıonnyı aýylynda turady. Jaqynda ol da júregine operasııa jasatý úshin Astana qalasyna júrgeli otyr. Nastıaǵa arnap aýyldastarynyń, sol jerdegi sharýashylyq ujymynyń, qarapaıym adamdardyń tıyndap jınaǵan qarjysy 150 myń teńge boldy.
– Saıbolat Núkeev degen kisi Nastıaǵa arnap 10 myń teńge ákelip berdi. «Myna balanyń jaǵdaıyn estigen soń qarap otyra almadym. Bir kempirge aýrý balany baǵý qalaı qıyn deseńshi. Aman-esen táýir bolyp kelip, ájesin qýantsyn», degen tilegin de aıtyp ketti, – deıdi qor tóraıymy Marııa Ábýtálipqyzy. Qaıyrymdylyq aksııalarynan aýdandaǵy Maıl Toroıan, Amanjol Elýbaev, Olga Keller, Pavel Chalyh, Vladımır Pýgachev sekildi belgili kásipkerler, sharýashylyq basshylary da qalyspaıdy. Jańa jyl men balalar kúni merekesinde «Meıirimdilik pen úmit sáýlesi» qaıyrymdylyq qory aýdandaǵy múgedek balalarǵa syılyqtar taratady. Sondaı kezderde aýdan turǵyndary aqshasyn aqshalaı, táttisin, kıim-keshegin úıip tastaıdy.
Aýrýdyń sheńgelindegi ár bala – qarabalyqtyqtardyń ortaq muńy, olar operasııadan aman qalyp, táýir bolyp kelse, ortaq qýanyshy. Qazir Qarabalyqtaǵy ár kisiden osy aýdandaǵy aýrý balany surasań, atyn aıtyp berýge daıar. О́ıtkeni, olardyń barlyǵy da osy balalardyń emdelýi úshin ótetin qaıyrymdylyq aksııasyn qur jibermeı qatysqan bolatyn. Birlik bar jerde – qaıyrymdylyq bar. Dostyq meıirim men adamgershilik bar jerde saltanat qurady. Bul – qarabalyqtyqtar úshin dáleldeýdi, artyq aıtýdy qajet etpeıtin túsinik, kúndegi qalyptasqan tirshilik.
Názıra JÁRIMBETOVA,
«Egemen Qazaqstan».
Qostanaı oblysy,
Qarabalyq aýdany.