Astanada Sport jáne deneshynyqtyrý isteri agenttiginiń uıymdastyrýymen «Qoǵamnyń ındýstrııalyq-ınnovasııalyq damý jaǵdaıyndaǵy dene tárbıesi men jalpyǵa birdeı sporttyq basymdyqtary men bolashaǵy» atty halyqaralyq ǵylymı-praktıkalyq konferensııa ótti.
Astanada Sport jáne deneshynyqtyrý isteri agenttiginiń uıymdastyrýymen «Qoǵamnyń ındýstrııalyq-ınnovasııalyq damý jaǵdaıyndaǵy dene tárbıesi men jalpyǵa birdeı sporttyq basymdyqtary men bolashaǵy» atty halyqaralyq ǵylymı-praktıkalyq konferensııa ótti.
Jıynda negizgi baıandamany agenttiktiń dene-shynyqtyrý departamentiniń dırektory Qanat Qazbekov jasap, elimizde buqaralyq, joǵary jetistiktegi sport jáne deneshynyqtyrý salasyn damytýda istelinip jatqan jumystar týraly keńinen áńgimelep berdi. Baıandamashy búgingi tańda «Memlekettiń ınnovasııalyq qyzmetti qoldaýy» týraly zańǵa sáıkes, elimizde sport salasyna ınnovasııalyq tehnologııalardy engizý máselesiniń jaqsy jolǵa qoıylǵanyn, sport mekemelerine ınnovasııalyq granttar berilip, ınnovasııalyq jobalardy iske asyrýǵa qoldaý kórsetilip jatqanyn atap ótti. Sonymen birge, ol Elbasynyń tapsyrmasyna sáıkes, 2020 jylǵa deıin elimizde buqaralyq sportpen aınalysýshylardyń sanyn 30 paıyzǵa jetkizý úshin barlyq jumystardyń jasalyp jatqanyn, osyǵan baılanysty «Deneshynyqtyrý jáne sport» týraly Zańǵa ózgerister men tolyqtyrýlardyń engiziletinin aıtty.
Budan keıin Reseı sporttyq menedjment federasııasynyń atqarýshy dırektory Svetlana Izaak «Ǵylymı-tehnıkalyq joba: jastar, jasóspirimder men balalardyń dene tárbıesimen aınalysýyna, dene bitimine monıtorıng jasaý» atty taqyrypta baıandama jasady. Ulttyq olımpıada komıtetiniń vıse-prezıdenti Anatóli Qulnazarov «Qazaqstan Respýblıkasyndaǵy 2022 jylǵa deıingi deneshynyqtyrý – sport júıesin jańartý» taqyrybynda óz oılaryn ortaǵa saldy. Ol óz sózinde el sportynyń qazirgi damý deńgeıi men keshegi KSRO kezindegi sporttaǵy jetistikterimizge taldaý jasap, eki kezeńdi salystyryp, óz baǵasyn berdi. Onda ol qazirgi sport júıesiniń burynǵy kezden álsirep qalǵanyn, degenmen, memleket tarapynan deneshynyqtyrý men sportty qoldaýǵa qolda bar múmkindiktiń bári jasalyp jatqanyn aıtty. Sonymen birge, ol aldaǵy on jylda sportty damytýǵa beriletin basymdyqtar týraly sóz qozǵady. Osy jerde A.Qulnazarov sportty ǵylymmen ushtastyrý, jattyqtyrýshylardyń bilimi men biliktiligin arttyrý, sporttyq medısınany damytý, qazaqtyń «Aıkýne» gımnastıkasymen aınalysý sııaqty jumystardyń mańyzdylyǵyn atap ótti.
Konferensııada Búkilreseılik áleýmettendirý men bilim ǴZI-nyń ǵylymı hatshysy Olga Rýmnyń «Estetıkalyq gımnastıka – jastar arasyndaǵy bolashaqtaǵy buqaralyq sport túri» atty baıandamasynda gımnastıkanyń bul túriniń densaýlyq pen dene symbattylyǵyn saqtaýdaǵy artyqshylyqtaryn aıtyp berdi.
Jıynnyń qorytyndy plenarlyq otyrysynda qarar qabyldandy.
Dastan KENJALIN,
«Egemen Qazaqstan».