KHDR bıligi Ońtústik Koreıanyń telehabarlaryn kórgeni úshin 80 adamdy ólim jazasyna kesti. Bul týraly Rbc.ua habarlady.
«Russia Today» telearnasy Soltústik Koreıada shetel telehabarlaryn kórgeni úshin 80 adam halyqtyń aldynda atylǵanyn málim etti. Jazalaý sharalary jergilikti stadıondarda júzege asyrylǵan. Tıym salynǵan shetel telehabarlaryn kórýmen qatar, olardyń keıbirine jezókshelikpen aınalysty degen aıyp taǵylǵan.
Ońtústik Koreıanyń «JoongAng Ilbo» gazeti jazǵandaı, ólim jazalary Soltústik Koreıanyń jeti qalasynda oryndalǵan. Jazalardyń kýágeri retinde 10 myń adam qatysqan. Olardyń ishinde balalar da bar. Gazettiń aqparat kózi QHDR bıliginiń adamdardy ólim jazasynyń kýágeri bolýǵa kúshtegenin alǵa tartady.
Kım Chen Ynnyń respýblıkany basqarý kezeńinde adamdardy jappaı ólim jazasyna kesý kóbeıip ketti. Sońǵy ret munda tamyz aıynda bir top ártisti halyq aldynda jazalaǵan edi. Jazaǵa ushyraǵandardyń arasynda Kım Chen Ynnyń burynǵy súıiktisi de bolǵan kórinedi. Oǵan pornofılmderdi taratty degen aıyp taǵylǵan.
Aıdar О́risbaev.
Derekkóz: Rbc.ua