L.N. Gýmılev atyndaǵy Eýrazııa ulttyq ýnıversıtetinde belgili karıkatýrashy-sýretshi, jýrnalıst Erkin Nurazhannyń «Sharj sherýi» atty kitap-albomynyń tusaýkeseri ótti.
L.N. Gýmılev atyndaǵy Eýrazııa ulttyq ýnıversıtetinde belgili karıkatýrashy-sýretshi, jýrnalıst Erkin Nurazhannyń «Sharj sherýi» atty kitap-albomynyń tusaýkeseri ótti.
Beıneleý óneriniń erekshe bir janry karıkatýra adamnyń boıyndaǵy kemshilikterdi áshkereleıdi desek, onyń bir salasy – sharj belgili bir tulǵany kúlkili beıneleý arqyly ishki jan-dúnıesin, bolmysyn, kelbetin kórsetýdi maqsat tutady. Dál osy erekshe ónerdiń damýyna, qalyptasýyna ózindik úles qosyp júrgen Qazaqstannyń halyq jazýshysy Muzafar Álimbaev «karıkatýra koroli» dep ataǵan karıkatýrashy-sýretshi – Erkin Nurazhan óziniń «Sharj sherýi» kitabyna 2005-2011 jyldar aralyǵynda salǵan saıasat, mádenıet pen ádebıet, sport salalaryndaǵy belgili tulǵalardyń, qoǵam qaıratkerleriniń ázil portretterin toptastyrypty.
Atalmysh is-sharaǵa Álibek Asqarov, Nesipbek Aıtuly, Kópen Ámirbek, Jeńis Kákenuly, Baıanǵalı Álimjanov, Dıqan Qamzabekuly syndy aqyn-jazýshylar, syqaqshylar, qoǵam qaıratkerleri jáne Eýrazııa ulttyq ýnıversıtetiniń stýdentteri qatysty.
Kitap-albomnyń tusaýkeseri aıasynda sharj sheberiniń biraz týyndylary kishigirim kórme retinde qoıylǵan eken. Kórermen qaýym sýretterdiń barlyǵyn kezek-kezegimen qyzyǵa qarap, beınelengen tulǵalardy tanyp, olardyń ómirdegi kelbetimen salystyryp, ezý tartyp jatty.
– Alystan qarasańyz, qalaı bolsa solaı salynǵan sýretter sııaqty kórinedi. Jaqyndaı kelip kúlkige keneldim. Karıkatýrashy ózi tańdaǵan tulǵalardyń kez kelgen adam baıqaı bermeıtin erekshelikterin keremet beınelegen, – deıdi stýdent Aıdana Joldygazınova.
Sýretshi Jeńis Kákenuly Erkin Nurazhannyń «Sharj sherýine» engen eki júz elýge tarta tanymal týyndylaryn kitap etip qalyptaýyna eleýli úles qosqan azamat. Ol Erkin aǵamen sonaý sekseninshi jyldary «Baldyrǵan» men «Aqjelken» jýrnaldarynda birge qyzmet istegen eken. «Kitapty daıyndaý barysynda Erkin aǵanyń oıyn, minez-qulqyn, bolmysyn bile tústim. Onyń baǵyty – sharj salasy. Bul birinshiden, mindetti túrde kúlki shaqyrý kerek. Ekinshiden, avtor boıynda árbir adam baıqaı bermeıtin ańǵarympazdyq qasıeti erekshe basym bolý kerek. Osy ekeýin de ushtastyra bilgen. Oǵan qosa, karıkatýra men sharjdyń arasynda óte bir názik shekara bar. Karıkatýra ýly sarkazm, qorlaý men mazaqqa negizdelgen. Al, sharj tek qana bári baıqaı bermeıtin adamnyń qylyqtaryn kúlkili etip beıneleý. Osyny túsinip, bul zańdylyqty saqtap júrgen de Erkin aǵa. Jalpy, qazaq halqy bir-birin qaǵytyp, ázildep kúlgendi unatady. Al búgingi tynymsyz tirshilikte qaljyńdasý men ázildesýdiń ózi azaıyp bara jatqan sekildi. Osy turǵydan alsaq bul sýretter qazaqtyń sol dástúrin jańǵyrtýǵa úles qosady. Erekshe alǵysymyzdy kitapty basyp shyǵarǵan «Folıant» baspasyna bildiremiz», – dedi Jeńis Kákenuly.
Erkin Nurazhan N.V.Gogol atyndaǵy Almaty kórkemsýret ýchılıshesin, T.Júrgenov atyndaǵy Almaty memlekettik teatr jáne kórkemsýret ınstıtýtynyń kórkemsýret fakýltetin bitirgen. «Kimge kúlemiz?» atty satıralyq sýretter albomy 2005 jyly jaryq kórgen. Sýretshi týyndylary búginde Qazaqstan Respýblıkasy Tuńǵysh Prezıdenti mýzeıinde, Almatydaǵy Á.Qasteev atyndaǵy óner memlekettik murajaıynda, О́skemen, Semeı qalalaryndaǵy beıneleý óneri murajaılarynda saqtaýly. Osydan bólek, Erkin aǵa «Baldyrǵan» jýrnalynda, «Túrkistan» gazetinde kórkemdeýshi redaktor, jýrnalıst qyzmetterin atqaryp, «О́ner» baspasynda bas redaktor bolǵan. Búginde Qazaqstan Sýretshiler jáne Jýrnalıster odaǵynyń múshesi. Osy eki ónerdi qatar alyp júrgeni úshin bolar, satırık-jazýshy Qaltaı Muhamedjanov oǵan «Erkin – qos mekendi adam ǵoı» dep qaljyńdaǵan kórinedi.
Kórmeden osy bir óner túrin qalyptastyryp, damytý jolynda 30 jyldan astam ýaqyt boıy eren eńbek etip júrgen Erkin aǵanyń jas býynǵa bereri mol ekenin ańǵardyq.
Nurzada Kúmisbek,
L.N.Gýmılev atyndaǵy Eýrazııa ulttyq
ýnıversıtetiniń stýdenti.