Saqtandyrý isi kúsheıip keledi

Birinshi kezekte Ákimshilik kodeks­tiń 425-baby negizinde táýliktik jáne kúndelikti qoldanatyn sharalardyń arnasy keńeıe túsýde. Munyń ózi – reıdtik jáne jospardan tys tekserýler, salynǵan aıyppuldar men keri qaıtarylǵan materıaldar. Árıne, shekteý tártibi men normalaryn saqtamaǵan jeke jáne zańdy tulǵalarǵa ákimshilik sharalar qoldaný – basty jáne jalań maqsat bolyp qalmaýǵa tıis. Saqtaný joldary men máseleleri ár turǵynnyń sana seziminen berik oryn almasa, birde-bir ákimshilik shara nemese otbasylyq basqosýlar ótkizgeni úshin salynǵan aıyppul oıdaǵydaı nátıje bere qoıýy ekitalaı. Bul týraly óz oı-pikirin Qobda aýdanynyń ákimi Bolat Kýlov bylaısha jetkizdi.

– Aýdan ortalyǵynda birneshe meıramhana bar. Qazir onyń bári de jabyq tur. Árıne, el bolǵan soń óz úıiniń aýlasynda kıiz úı tigip, shaǵyn toı jasaǵandar kezdesti. Áıtse de olardyń sany saý­saqpen sanap alýǵa da jetpeıdi. Dúnıede kez kelgen qubylystyń qadir-qasıeti salystyrmaly túrde aıqyndalady emes pe? Bul turǵyda aýdanymyzdyń turǵyndary belgilengen zań men tártipti saqtap, oǵan qulaq asa alatyndyǵymen erek­shelenip otyrǵanyn aıtqym keledi. My­saly, qazirgi kúni sanıtarlyq dári­gerlerdiń qoıǵan talaptaryn oryndaý jóninen oblysta eń aldyńǵy qatarda kele jatqanymyz – osy oı-pikirimniń aı­qyn dáleli. Áıtse de bul jaıt bizge pro­fılaktıkalyq sharalardy udaıy júrgizý isinen ajyrata almaıdy, – deıdi ol.

Budan ári aýdan basshysy atalǵan ja­­ǵymdy jaıt Qobda óńirinde belgi­len­gen sa­nıt­arlyq-epıdemııa­lyq talaptardy buzý kórinisi joq eke­nin bildirmeıtinin atap ótti. Qazirgi is-qı­myl sony joıýǵa ba­ǵyttalyp otyr­ǵanyn jetkizdi. Osy oraı­da jaǵdaıdy joǵa­rydan baqylaýǵa b­aǵyt­talǵan drondar satyp alynypty. Osy­ny ózdiginen basqarylatyn apparattar juma, senbi jáne jeksenbi kúnderi aýyl ishine jetkiziledi eken. Mine, ob­­­lystyń ońtústik-batys bóliginde or­na­­­las­qan aýdanda indetti aýyzdyqtaý isi osy­­laısha kúnnen-kúnge beleń alyp keledi.

Aqtóbe oblysy,

Qobda aýdany