Keı óńirlerde koronavırýs juqtyrý faktilerin jasyrý jaǵdaılary kezdesken. Bul jóninde koronavırýs indetiniń taralýyna qarsy is-qımyl jónindegi keńeste Qazaqstan Prezıdenti Qasym-Jomart Toqaev aıtty, dep habarlaıdy Egemen.kz
Prezıdent keıbir óńirlerde atalǵan dertpen aýyrǵandar sanynyń artýyna baılanysty júıeli sharalar qabyldaýdyń mańyzdylyǵyna nazar aýdardy.
Memleket basshysy óz sózinde indet juqtyrǵandardyń barynsha naqty esebin alý vırýspen kúrestiń basty talaby ekenin aıtty.
– Birqatar oblystarda koronavırýs indetine qatysty jańa jaǵdaılardy jasyrý derekteri anyqtaldy. Áńgime Shyǵys Qazaqstan, Soltústik Qazaqstan, Pavlodar, Aqmola, Qostanaı jáne basqa da oblystar jaıynda bolyp otyr. О́tirikti shyndaı sóıletý asa qaýipti qubylys ekenin túsiný kerek. О́ıtkeni ol shynaıy qaýiptiń betin búrkemeleıdi. Sondaı-aq búkil elimiz boıynsha koronavırýs indetine qarsy júrgizilip jatqan kúres strategııasyna zııanyn tıgizedi. Qazirgi ahýal jete baǵalanbaı, qabyldanǵan sharalar tolyq júzege asyrylmaı otyr. Halyqtyń indetten saqtaný deńgeıi tómendep ketken. Bul – aksıoma. Mundaı jaǵdaı álemniń kóptegen elinde baıqalýda. Atalǵan problemanyń bizdiń densaýlyq saqtaý júıemizde de sozylmaly sıpat alǵanyn moıyndaýymyz kerek, dedi Qasym-Jomart Toqaev.
Memleket basshysy Densaýlyq saqtaý mınıstrligine Ulttyq statıstıka bıýrosymen birlesip, medısınalyq statıstıkany baǵalaý jáne taldaý jóninde keshendi jospar ázirleýdi tapsyrdy. Sonymen qatar barlyq densaýlyq saqtaý uıymdarynyń tolyq daıyn bolýyn qamtamasyz etýdi mindettedi. Bul áskerı medısınaǵa da tikeleı qatysty.
Sebebi olar indetpen kúresý úshin shuǵyl kúsh jumyldyrýǵa jáne quraldarmen jabdyqtaýǵa daıyn bolýy tıis. Aıta keteıik, búgin Qazaqstan Prezıdenti Úkimet múshelerimen, birqatar organ basshylarymen, qalalar men oblystardyń ákimderimen vıdeokonferensııa rejıminde keńes ótkizdi.