Májilis depýtattary – Nur Otan partııasy fraksııasynyń músheleri Gúlnar Bıjanova, Qudaıbergen Erjan, Balaıym Kesebaeva, Berik Ospanov jáne Artýr Platonov praımerız sheńberinde aımaqtardaǵy partııa konferensııalaryna pikirtalastarǵa qatysyp, eń kóp daýys jınady, dep habarlady Májilistiń baspasóz qyzmeti.
Aımaqtarda partııa konferensııalary ótip, Májiliske partııalyq tizim boıynsha úmitkerler arasynda pikirtalastar uıymdastyryldy. Olardyń qatarynda ózekti baǵyttar boıynsha jumystaryn jalǵastyrý úshin óz kandıdatýralaryn usynǵan Májilistiń qazirgi depýtattary da bar.
Atap aıtqanda, Artýr Platonov Almatydaǵy áleýmettik máselelerdi sheshý jáne ekologııany jaqsartý jónindegi óz ıdeıalaryn usynsa, Berik Ospanov Shymkent qalasynda agroónerkásiptik keshendi damytý jáne otandyq kásipkerlerdi qoldaý máselelerin kóterdi. Gúlnar Bıjanova men Balaıym Kesebaeva Májilistiń Zańnama jáne sot-quqyqtyq reforma komıtetiniń músheleri retinde Qaraǵandy jáne Qyzylorda oblystarynda sóz sóılep, qazaqstandyqtardyń ózekti máselelerin sheshý úshin zańnamany jetildirý taqyrybyn qozǵady. Sonymen qatar Qudaıbergen Erjan Túrkistan oblysynda eldiń qaýipsizdigin jaqsartý úshin tıimdi dıalog quryp, sanaly sheshimder qabyldaý qajettigine nazar aýdardy.
Pikirtalas barysynda Májilistiń qazirgi depýtattary ózderiniń zańnamalyq jumysynyń tájirıbesin, halyqtyń ómir súrý jaǵdaıy men otandyq ekonomıka salalarynyń ózekti máselelerin tereń biletinderin kórsetip, qandaı da bir saladaǵy jaǵdaıdy jaqsartý jáne jalpy óńirlerdi damytýǵa arnalǵan naqty usynystar aıtty. Sondaı-aq olar mańyzdy taqyryptar boıynsha syndarly baılanys qura biletindikterin kórsetti.
Pikirsaıys qorytyndysy boıynsha Májilistiń qazirgi depýtattary eń kóp daýys jınap, óz óńirlerinen partııalyq tizimge endi.