Qazaq memlekettik qyzdar pedagogıkalyq ýnıversıteti elge kerekti taǵy bir ıgi jıynnyń uıytqysy boldy
Osynaý taǵylymy mol alqaly sharaǵa Elbasy Nursultan Nazarbaevtyń Qazaqstan halqyna Joldaýynda aıtylǵan: «Memleket úshin jáne meniń jeke ózim úshin de anany qorǵaý – erekshe másele. Qymbatty hanymdar! Sizder – otbasynyń, demek, memlekettiń tiregisizder», degen ulaǵatty sózi negiz etip alynypty. Olaı bolsa, «Áıel jáne otbasylyq qundylyq: dástúrli otbasylyq saıasattyń tájirıbesi» taqyrybyn keńinen qaýzaǵan halyqaralyq ǵylymı-praktıkalyq konferensııanyń da óz aldyna asa izgilikti, búgingi qazaq qoǵamyna paıdaly maqsattar qoıýy da bek jarasymdy.
Qazaq memlekettik qyzdar pedagogıkalyq ýnıversıteti elge kerekti taǵy bir ıgi jıynnyń uıytqysy boldy
Osynaý taǵylymy mol alqaly sharaǵa Elbasy Nursultan Nazarbaevtyń Qazaqstan halqyna Joldaýynda aıtylǵan: «Memleket úshin jáne meniń jeke ózim úshin de anany qorǵaý – erekshe másele. Qymbatty hanymdar! Sizder – otbasynyń, demek, memlekettiń tiregisizder», degen ulaǵatty sózi negiz etip alynypty. Olaı bolsa, «Áıel jáne otbasylyq qundylyq: dástúrli otbasylyq saıasattyń tájirıbesi» taqyrybyn keńinen qaýzaǵan halyqaralyq ǵylymı-praktıkalyq konferensııanyń da óz aldyna asa izgilikti, búgingi qazaq qoǵamyna paıdaly maqsattar qoıýy da bek jarasymdy.
Iá, ana men balany qorǵaýdan, otbasy qundylyǵyn ámbe halyq ıgiligine jaratýdan asqan izgilik bolar ma. Osy máseleler bizdiń elimizde birinshi kezekke shyǵarylyp, basymdyq alyp jatsa, ol da bir ǵanıbet. Konferensııany quttyqtaǵan Ulttyq Bank tóraǵasy Qaırat Kelimbetov osy jaǵdaıdy erekshe atap kórsetti. Al alqaly jıynǵa moderatorlyq etken Qyzdar ýnıversıtetiniń rektory, Qazaqstan Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń múshesi Dınar Nóketaeva «Qazirgi qazaq qoǵamyndaǵy áıel mártebesi» atty betashar baıandamasynda qazirgi zamandaǵy otbasy, otbasy tárbıesindegi ananyń róli, jastardy jarasymdy otbasylyq ómirge daıarlaý týraly tolǵamdy oılaryn jetkizdi. Áıel mártebesi oraıyndaǵy dástúrshildik pen jańashyldyqtyń úılesimin tabýǵa umtyldy. Sóıtip, tarıhı jáne áleýmettik turǵydan alǵanda, qazirgi Qazaqstandaǵy áıeldiń jalpy jańa deńgeıge kóterilýiniń negizgi alǵysharttaryn atap kórsetti. Iá, búgin tańda qazaq qoǵamynda áıel mártebesi órkendeı túsken, gendorologııa ilimi damý ústinde, genderlik saıasat salıqaly júrgizilýde. Osyǵan sáıkes Qazaq memlekettik qyzdar pedagogıkalyq ýnıversıteti janynan ashylǵan Áleýmettik jáne genderlik zertteýler ınstıtýty sońǵy jyldary qoǵamdaǵy áıel mártebesi haqynda irgeli zertteýler júrgizip keledi.
Osy arada aıta keteıin, «Qazaqtyń Ostrovskııi» atanǵan jankeshti ádebıetshi ǵalym Nemat Kelimbetovtiń talqyly taǵdyry men shyǵarmashylyǵy, onyń jary Qýanysh Tazabekqyzynyń qıyndyqqa qaıyspaǵan qaısarlyǵy men meıirimi, osynaý otbasynyń jan jylýy, júrek tazalyǵy men adal senimi atalmysh konferensııadaǵy áńgimeniń altyn arqaýy bolyp tartyldy. Fılolog-ǵalym, «Memlekettik tilge qurmet» qoǵamdyq birlestiginiń tóraıymy Asyly Osman osy oraıda tebirene sóılep, qazaq ulyn – narǵa, qyzyn – arǵa balaǵan deı kele, osyndaǵy nar – Nemat Kelimbetov, al ar – Qýanysh Tazabekqyzy dep aıta alamyz degenin de kópshilik qaýym qup kórdi.
Belgili jazýshy Smaǵul Elýbaı Nemat jáne Qýanysh Kelimbetovter otbasynyń synaqqa toly ómirin bıblııalyq sıýjettermen para-par dep baǵalady. Naq osy dástúrli otbasy qasıetteri, qazaqy tárbıe artyqshylyǵy taǵdyr soqqysy talmaý jerden urǵanda jasymaýǵa, qaırat-jiger taýyp, taýqymetti jeńip shyǵýǵa múmkindik beripti. Ardy, mahabbatty, adaldyq pen senimdi saqtaýǵa septesipti. Tán azabyn tartyp jatyp tárjimá jasap, jan men rýh mereıin ósirip, shyǵarmashylyq eńbekke qamshylapty. Osylaısha, búginde álemge tanylǵan, túrki dúnıesi han kótergen ólmes te ónegeli shyǵarmalaryn jazdyrtypty. Onymen de qoımaı, Muhıt pen Qaırat esimdi uldaryn azamat etip ósirip atqa qondyrypty. Osynyń bári erli-zaıyptylardyń órshil rýhynyń, talmas talabynyń, bıik parasatynyń, jarǵa degen adal mahabbattyń arqasynda múmkin bolypty. Otbasylyq ulaǵatty úlgi dep te osyny aıtamyz. Áıeldiń qajyr-qaıraty. Rýh erligi. Qalaı deseńiz de jarasady.
Mine, osy jaılardy Reseı sóz óneri akademııasynyń akademıgi, «Hýdojestvennaıa lıteratýra» baspasynyń dırektory Georgıı Prıahın, ázerbaıjandyq aqyn, óner qaıratkeri Shyńǵys Alıoǵly, Ádebıet jáne óner ınstıtýtynyń dırektory, fılologııa ǵylymdarynyń doktory Ýálıhan Qalıjanov, «Egemen Qazaqstan» respýblıkalyq gazetiniń basshysy, fılologııa ǵylymdarynyń doktory Saýytbek Abdrahmanov, Qytaı jazýshylary jýrnalynyń bas redaktory Akbar Májıtuly, akademık Seıit Qasqabasov, Túrkııadaǵy Mımar Sınan kórkemóner ýnıversıtetiniń professory Ábdiýaqap Qara, abaıtanýshy Mekemtas Myrzahmetov, QHR «Ulttar baspasy» qazaq redaksııasynyń bastyǵy Baqytbek Toqtasynuly, Túrkııadaǵy Mármara ýnıversıtetiniń professory Gúlshen Seıhan Alyshyq, Qazaqstannyń eńbek sińirgen dárigeri Sholpan Aıýpova jáne basqalar tarata aıtyp, búgingi qoǵamǵa otbasy qundylyqtarynyń, rýh erliginiń úlgisi retinde usyndy.
Konferensııaǵa qatysýshylar «Ulylyqty ulyqtaǵan analar» atty sýret kórmesin, «Qaıǵydan baqyt jasaǵan» atty kitap kórmesin, uly qazaq analaryna arnalǵan «Aqtumar» murajaıyn tamashalap kórdi. Tústen keıin úsh seksııa boıynsha plenarlyq májilister jalǵasty. Al Abaı atyndaǵy QazUPÝ-de pedagogıka ǵylymdarynyń doktory, osy oqý ornynyń apparat jetekshisi, professor Baqtııar Smanovtyń moderatorlyǵymen jazýshy, túrkolog-ǵalym Nemat Kelimbetovtiń álem tilderinde basylyp shyqqan kitaptarynyń tusaýkeser rásimi ótip, sonymen birge, «Nemat Kelimbetov atyndaǵy túrkitaný ortalyǵy» ashyldy. Keshkisin Muhtar Áýezov atyndaǵy akademııalyq drama teatrynda jazýshynyń «Úmit úzgim kelmeıdi» atty álemdi sharlap ketken ataqty shyǵarmasynyń sahnalyq qoıylymy kórsetildi.
Qorǵanbek AMANJOL,
«Egemen Qazaqstan».
ALMATY.
Sýretti túsirgen
Bersinbek SÁRSENOV.