Kópshilikke myna tarıhı sýretti usynýdy jón kórdim. Bul táýelsizdigimizdiń alǵashqy jyldarynda Elbasymyzdyń Katonqaraǵaı aýdanyna alǵash kelgen kezdegi Berel aýylynyń mańynda, sol kezdegi aýdan basshylary men Katonqaraǵaı maral keńsharynyń eńbekkerlerimen túsken sýreti. Árıne, Elbasymyz shyraıly shyǵysqa, onyń ishinde jer jannaty atalǵan Katonqaraǵaı jerine odan keıin de san márte at basyn burǵany belgili. Sonyń ishinde aýdanymyzǵa Elbasynyń alǵash kelýi jerlesterimizdiń jadynda qalyp, áli kúnge tamasha bir sezimdermen eske alyp otyrady.
Sol jyly jaz erte shyqty, alǵashqy kúnderinen bastap jaýyndy boldy. Sondaǵy jaýǵan jaýyn erekshe esimizde qalypty. Neshe kún kúndiz-túni jaýǵan jaýynnyń áserinen Buqtyrma ózeni at qulaǵyna shyǵa tasyp, Katonqaraǵaı jurtshylyǵyn birtalaı ábigerge túsirgeni de esimizde. Aýa raıynyń qolaısyzdyǵyna baılanysty tikushaqtyń ushýy múmkin bolmaǵandyqtan N.Á.Nazarbaev bastaǵan delegasııa Rahman qaınarlaryna deıin avtomobılmen júrip ótetinin estip-bilip otyrdyq. Delegasııa mingen avtomobılder korteji Katonqaraǵaı – Aqqaınar (sol kezde Chernovaıa) – Jambyl – Rahman qaınarlary baǵytyndaǵy asfalti joq jolmen júrip ótti.
Jol boıyndaǵy aýyldardyń turǵyndary Prezıdent mingen kólikterdi alystan bolsyn kórip qalý úshin sorǵalaǵan jaýynnyń astynda saǵattap turǵan edi. Erteńgi kúni tańerteń kún shaıdaı ashylyp N.Á.Nazarbaev bastaǵan delegasııa tikushaqpen Berel aýylynyń mańyndaǵy maral qystaǵynyń janyna kelip qonyp, Katonqaraǵaı maral keńsharynyń eńbekkerlerimen kezdesti. Myna sýret sol kezden qalǵan estelik.
N.Á.Nazarbaev Qazaqstan Respýblıkasynyń egemendigin jarııalap, táýelsizdik alǵannan bastap, táýelsizdikti alýdan góri ony qorǵap, saqtap qalý asa qymbat ekendigin basa aıta otyryp, ony durys damý jolyna túsire bildi. Nátıjesinde, Qazaqstan Respýblıkasy ózin búkil álemge pash etti, órkenıetti memleketter qataryna qosyldy. Basqa jetistikterimizdi aıtpaǵannyń ózinde, ishki turaqtylyqtyń arqasynda syrtqy saıasatymyz bekip, álem memleketteri arasynda bedeli arta tústi. О́tken jyldar ishindegi Elbasynyń elimiz úshin jasaǵan eren eńbekteri el jadynda máńgi qalary sózsiz.
Toqsanynshy jyldardaǵy toqyraý kezeńiniń aýyrtpalyǵy az bolmady, osy aýyrtpalyqtardy halyqpen birlese otyryp eńserip, aldymen memlekettik rámizderimiz aspan tústes kók Týymyzdy, ortaq shańyraq beınelengen Eltańbamyzdy, shyrqaǵanda júregińdi jigerlendiretin Gımndi bekitip, bar álemge pash etti. Ulttyq valıýtamyz – teńge aınalymǵa shyqty. Reseı, Qytaı, О́zbekstan, Túrikmenstan jáne Qyrǵyzstan elderimen aradaǵy shekaramyz bekitildi.
Iá, bir qaraǵanda bul ıgilikterge op-ońaı qol jetken sııaqty bolyp kórinýi múmkin. Al shyndyǵyna kelgende, bul – naǵyz jankeshti erlikke turatyn Elbasynyń suńǵyla da syndarly syrtqy saıasatynyń jemisi ekendiginde kúmán joq. Bulaısha aıtýǵa úlken negiz bar. Aıta bersek, mundaı mysaldar óte kóp. Ońdy ózgeristerdi ár oblys pen aýdan ómirinen kórýge bolady, óıtkeni, táýelsizdik shuǵylasy keń-baıtaq qazaq dalasyn qamtydy. Aıtýǵa ǵana ońaı osy jańarýlar men damýlardyń astarynda el birligi men tirliginiń, Elbasymyzdyń eseli eńbegi men mańdaı teriniń qanshama syry jatyr deseńizshi...
Dúısen BRALINOV
Shyǵys Qazaqstan oblysy,
Katonqaraǵaı aýdany