Qazaqstanda keń aýqymdy «Kıik» tabıǵatty qorǵaý aksııasy bastaldy. Bul brakonerliktiń aldyn alýǵa, sondaı-aq faýnanyń basqa da túrlerin satýǵa jáne ótkizýge mamandanǵan qylmystyq toptardyń qyzmetin anyqtap, olarmen kúres jumystaryn kúsheıtý maqsatyna baǵyttalǵan shara.
«Kıik» aksııasyna «Ohotzooprom О́B» kásipornynyń Janýarlar dúnıesin qorǵaý qyzmetinen 224 ınspektor, 68 jol talǵamaıtyn kólik, 23 qarda júrgish tehnıkasy, 2 birlik «Berloga» vagonshalary (OО́F, BО́F) jumyldyrylady. Sonymen qosa «Ohotzooprom О́B» bastamasymen erekshe qorǵalatyn tabıǵı aýmaqtar men Janýarlar dúnıesin esepteý jáne monıtorıng bólimderinen ınspektorlar tartylmaq.
Ár óńirlik fılıalda oblystyq aýmaqtyq ınspeksııalar men ishki ister organ ókilderinen jasaqtalǵan birlesken mobıldik toptar jumys isteıdi. Sondaı-aq ákimdikterdiń kelisimimen belgilengen karantındik blok beketterinde «Kıik» keń aýqymdy aksııasy boıynsha birlesken is-sharalar júrgizilmek.
Atalǵan naýqan Aqmola, Aqtóbe, Atyraý, Jambyl, Batys Qazaqstan, Shyǵys Qazaqstan, Qaraǵandy, Qostanaı, Qyzylorda, Mańǵystaý, Pavlodar jáne Soltústik Qazaqstan oblystarynyń aýmaǵynda ótkiziledi.
2019 jyly kıikterdi zańsyz atýdyń 47 brakonerlik faktisi anyqtalyp, 641 usha men 284 kıiktiń múıizi tárkilendi. 203 ákimshilik hattama toltyrylyp, qylmystyq jazaǵa 43 zań buzýshy tartyldy. Tabıǵat resýrstaryna keltirilgen shyǵyn 3,3 mlrd teńgeni qurady.
Byltyr Memleket basshysynyń tapsyrmasymen Qazaqstanda brakonerlikke qarsy jaza kúsheıtildi. Qolǵa alynǵan aksııa 31 jeltoqsanǵa deıin jalǵasady.