Tuńǵysh Prezıdent kúni merekesinde kúzde shaqyrylǵan bir jarym myńnan astam merzimdi qyzmettegi sarbaz ońtústik jáne batys óńirlerdegi áskerı bólimderde áskerı ant berdi.
Kúzgi áskerge shaqyrý naýqany barysynda Qarýly Kúshterdiń áskerı bólimderi Qazaqstannyń barlyq óńirlerinen kelgen sarbazdarmen tolyqty. Olar alǵashqy áskerı daıyndyq baǵdarlamasyn aıaqtap, mereke kúni áskerı ant berdi.
Saltanatty rásimge áskerler qolbasshylary men olardyń orynbasarlary, áskerı bólimderdiń komandırleri qatysty.Áskerı ant qabyldaǵannan keıin jas sarbazdar qoıan-qoltyq urys pen saptyq daıarlyq elementterin kórsetti. «Elimiz úshin aıtýly kúni dál osyndaı áskerı ant qabyldaý bizge úlken mártebe. Bul bárimizge erekshe jaýapkershilik júkteıdi. Barlyq azamattardy Qazaqstan Respýblıkasynyń Tuńǵysh Prezıdenti kúnimen quttyqtaımyn! Otanymyzdyń ıgiligi úshin áskerı boryshymyzdy abyroımen oryndaımyz dep senimmen aıta alamyn», dedi 41433 áskerı bóliminiń qatardaǵy jaýyngeri Aıbar Omar.
Sanıtarlyq-epıdemııalyq jaǵdaıdy eskere otyryp, saltanatty is-shara týystary men jaqyndarynyń qatysýynsyz ótti.
Otan aldynda adal bolýǵa ant berý – ár azamattyń ómirindegi umytylmas oqıǵa. Otan qorǵaýshylar ózderiniń konstıtýsııalyq mindetterin abyroımen atqaryp, ata-anasynyń, eliniń jáne el Prezıdentiniń senimin aqtaýǵa daıyn. Áskerı bólimderdiń basshylyǵy óz kezeginde, sarbazdardyń áskerı boryshyn sátti atqarýy, áskerı mamandyqtardy, áskerı daıarlyqtyń udaıy ótkiziletin sabaqtaryn meńgerýi úshin bar jaǵdaıdy jasaǵan.