Jańa jyldyq shyrshany jaǵý elimizde dásúrge aınalǵan. Elordamyzdyń «Esil» aýdanyna qarasty Aqorda jáne qalanyń eski alańyndaǵy qalalyq ákimdik aldyndaǵy elimizdiń bas shyrshalarynyń shamyn jaǵý rásimi bolyp ótti.
Jańa jyldyq shyrshany jaǵý elimizde dásúrge aınalǵan. Elordamyzdyń «Esil» aýdanyna qarasty Aqorda jáne qalanyń eski alańyndaǵy qalalyq ákimdik aldyndaǵy elimizdiń bas shyrshalarynyń shamyn jaǵý rásimi bolyp ótti.
Ádette Astanada qar qarashada túsip, jurtty ábigerge salyp jatatyn. Bıylǵy jyly qar Tuńǵysh Prezıdent kúni, ıaǵnı 1 jeltoqsanda jaýyp, qystyń bastalǵandyǵyn bildirgendeı áser qaldyrdy. Qystyń mundaı jaqsy ásermen bastalýyn jurt jaqsylyqqa balap jatyr. Qalaı bolǵan kúnde de ulpa qar men aýa raıynyń jaıly bolýy balalar úshin oınaýǵa naǵyz qolaıly kez ekeni daýsyz. Keshe Astana aýlalarynda qarmen oınaǵan balalar bir rahattanyp qaldy. Al keshkisin olar ata-analarymen birge qala alańdaryna ornatylǵan shyrshalardyń aınalasyna toptasty. Sondaı sharanyń biri Astana ákimdigi aldynda ornatylǵan qalanyń bas shyrshasynyń janynda ótti. Biz kelgen kezde munda qyzý daıyndyq jumystary júrip jatty. Shyrshanyń aınalasy qardan tazartylyp, jerge qum tóseldi. Artynsha merekelik shara balalar ánimen bastalyp, bıge ulasty. Jańajyldyq kıimderin kıgen balalar men ertegi keıipkerleri merekelik sharanyń árin kirgizdi.
Alańda ornatylǵan bıik shyrsha ádemi áshekeılerimen kóz tartady, onyń ústine appaq mamyqqa oranǵan. Jınalǵandar aldynda sóz alǵan Saryarqa aýdanynyń ákimi Ermaǵanbet Bólekbaev aldaǵy kele jatqan jańa jylmen quttyqtap, aıtýly mereke tabysymen kelsin degen ıgi tilegin jetkizdi. Elimizdiń bas shyrshasyn jaǵý úshin balalar bar daýystarymen Aıaz Atany ortaǵa shaqyrdy. Qazaqy oıý-órnekterimen kómkerilgen ton kıgen aq saqaldy Qys atasynyń kelýimen shyrsha shamdary jaǵylyp, jarqyrap shyǵa keldi. Quramaly bıik shyrshaǵa myńdaǵan oıynshyqtar, dıodtyq shamdar men gırlıandiler ilingen. Shyrshanyń aınalasynda Aıaz Ata men Aqsha qardyń qatysýymen teatrlandyrylǵan kórinis qoıylyp, aınala júrip án salyndy. Eń bastysy – bas shyrshalardyń janynda otshashý boldy. О́zin Gúlnur Smaǵulova dep tanystyrǵan ata-anadan jańa jyldyq merekege kózqarasyn suraǵan kezimizde, munyń balalar úshin óte qajet ekenin aıtty. Onyń pikirinshe, bul da halqymyz aıryqsha kútetin erekshe, ózindik orny bar mereke. Sondyqtan da álem bolyp toılaıtyn merekeden syrt qalýymyz orynsyz bolar edi.
Aqorda men qalanyń eski alańyndaǵy bas shyrshalar shamy jaǵylysymen, elordada ornatylǵan barlyq shyrshalar da jaınap shyǵa keledi. Osylaısha elimizde jańajyldyq sharalardyń bastalýyna resmı túrde ekpin berildi. Qystyń birinshi kúni aq qardyń túsýinen bastalǵandyqtan, aq tilegimiz aldaǵy jyly oryndala bersin dep tileıik!
Asqar TURAPBAIULY,
«Egemen Qazaqstan».