Memleket basshysy Volonter jylynyń jabylý rásiminde kolonterlik qyzmetti qoldaýdyń biryńǵaı standartyn jasaýdy tapsyrdy, dep habarlaıdy Egemen.kz.
"Eriktiler qyzmetin uıymdastyrýdyń basty talaptary men ustanymdaryn aıqyndap alǵan jón. Osy maqsatpen Volonterlik qyzmetti qoldaýdyń biryńǵaı standartyn jasaýdy tapsyramyn. Volonterlik – bul jaı ǵana áleýmettik qubylys emes. Tipti, bir kúnde qalyptasatyn ádet nemese daǵdy deýge de bolmaıdy. Bul – kóptegen adamdardyń sanaly túrde tańdaǵan ómir salty. Qaıyrymdylyq – adamnyń bala kezinen boıǵa sińetin qasıet. Sondyqtan, óskeleń urpaqty jastaıynan jaqsylyq jasaýǵa tárbıeleý – óte mańyzdy mindet", dedi Prezıdent.
Osy rette, ol barlyq bilim berý mekemelerinde taqyryptyq sabaqtar men fakýltatıvtik saǵattar engizýdi usyndy.
"Qoǵamǵa qyzmet etýdi zerdesine túıgen ul-qyzdarymyz naǵyz azamat bolary anyq. Dana Abaı aıtqan "Ystyq qaırat, nurly aqyl, jyly júrek" dál qazirgi kezeńde aýadaı qajet. Bul asyl qasıetter volonter qataryna qosylamyn degen árbir jastyń boıynan tabylady dep senemin", dedi Q.Toqaev.