Qazirgi kúnderi ishki ister organdarynda júrgizilip jatqan úılerdegi tirkelmegen qarýlardy tapsyrý jónindegi aksııanyń ózin tabys tabýdyń bıznesine aınaldyrǵan pysyq jigitter tabylyp jatyr.
Qazirgi kúnderi ishki ister organdarynda júrgizilip jatqan úılerdegi tirkelmegen qarýlardy tapsyrý jónindegi aksııanyń ózin tabys tabýdyń bıznesine aınaldyrǵan pysyq jigitter tabylyp jatyr.Solardyń biri – Almaty oblysy Qaratal aýdanynyń Kópbirlik atty shalǵaıdaǵy aýylynda turatyn 29 jasar Sálim Álımanov esimdi jigit gazetten ótip jatqan shara týraly oqyǵan boıda jaqyn mańdaǵy eldi mekenderge shuǵyl attanady. Bıznestiń jańa túrine bilek sybana kirisken ózi turatyn Balqash kóliniń aýmaǵyn biraz sharlap, jergilikti turǵyndar men balyqshylardan tegis oqpandy qarýlaryn árqaısysyn 15 000 teńgege satyp ala bastaǵan. Ol bar-joǵy 10 kúnniń ishinde osylaı túrli úlgidegi 12 tegis oqpandy qarý jınap alady da, Qaratal aýdandyq ishki ister bólimine ótkizedi. Sol úshin pysyq jigit birden 399 861 teńge taza paıda alǵan.
Kól jaǵasyndaǵy aýyl jigitiniń bul bıznesi qazir kórshi Qaraǵandy oblysyna da jetipti. Sóıtip, Balqashtyń kelesi betindegi qarýy bar turǵyndar da buǵan tartyla bastaǵan. Alaıda, kóp uzamaı bul daqpyrt prokýrorlardyń qulaǵyna jetip, olar «alypsatarlyqtyń» jolyn kesti.
Qaratal aýdanynyń prokýrory Quralbek Shoıbekovtiń sózine qaraǵanda, zańsyz saqtalyp kelgen qarýdy erikti túrde tapsyrý azamattardy qylmystyq jaýapkershilikten bosatady. Qylmystyq jaýapkershilikten bosaǵannan bólek, oǵan erikti túrde qarý tapsyrǵany úshin materıaldyq ótemaqy tólenedi. Biraq qarýlardy óz betimen satyp alatyndaı Sálim Álımanovqa eshkim quqyq bergen joq. Bul jaǵdaıda ol azamattyq qarýdy satyp alý úshin ishki ister organdarynan ruqsat alý kerek eken.
Qaratal aýdandyq prokýratýrasy aýdandyq ishki ister bóliminiń basshysy atyna qarý satyp alýshyny ákimshilik jaýapkershilikke tartý týraly usynys joldady.
Rýslan IGILIK.