«Qyzyl aımaqtaǵy» jalǵyz óńir Atyraýda koronavırýsty juqtyrýshylar nege kóbeıdi?

Oblystyq densaýlyq saqtaý basqar­masy baspasóz qyzmetiniń málimetine súıensek, sońǵy eki táýlikte qaýipti indetti 169 adam juqtyryp otyr. Onyń ishinde 30 naýqas Atyraý qalasynda tirkelgen. Koronavırýsty juqtyrýshylardyń deni burynǵysha Teńiz kenishindegi ju­mys­shylar ekeni anyqtalǵan. О́t­ken eki táýlikte atalǵan ken ornynda ju­mys isteıtin 123 jumysshy qaýip­ti in­detke shaldyqty. Sondaı-aq Maqat, Ma­­hambet, Inder, Qurmanǵazy aýdan­darynyń turǵyndarynan da Sovid-19 ınfeksııasynyń belgisi tabyldy.

Tek sońǵy bir táýlikte 112 naýqas koronavırýs ınfeksııasynan emdelip shyǵypty. Qazir 249 adam úı jaǵdaıynda emdelýde. Oblystyq ınfeksııalyq stasıonarda – 78, aýdandardaǵy stasıonarlarda 13 pasıent jatyr. Al Teńiz kenishindegi ınfeksııalyq stasıonarda em qabyldap jatqan naýqastardyń sany 321 adamǵa jetip otyr.

«Teńizshevroıl» JShS-nyń Úkimet­pen jáne jurtshylyqpen baılanys bóliminiń bas menedjeri Rzabek Ar­ty­ǵalıevtiń aıtýynsha, Teńiz keni­shin­degi jumysshylardyń qaýipti indetti juqtyrýynyń mynadaı bir sebebi bar. «Merdiger mekemelerdiń keıbir qyzmetkerleri sanıtarlyq beketterden jalǵan PTR-test anyqtamalardy kórsetý arqyly ótken faktiler anyqtaldy. Osyndaı qyzmetkerlerge berilgen ruq­sattar dereý joıyldy. О́reskel faktiler týraly tıisti memlekettik organdarǵa habarlandy. Resmı tergeý júrgiziledi dep kú­tilýde», deıdi ol.

Mundaı derektiń aıtylýy negizsiz emes. Tipti óziniń de, ózgeniń de saýlyǵyn oılamaıtyn keıbir pysyqaılar ken ornyndaǵy blok-beketterdi aınalyp ótýge tyrysady eken. Dál osy derekti polısııa qyzmetkerleri joqqa shyǵarmaıdy. О́ıtkeni Jylyoı aýdandyq polısııa bólimi Teńiz polısııa bólimshesiniń qyz­metkerleri ken ornyndaǵy blok-beketti aınalyp ótpek bolǵan bir top adamnyń jolyn kesip, tosqaýyl qoıdy. Jaqynda atalǵan bólimsheniń patrýldik polısııa ınspektory, polısııa kapıtany Tileýke Qumarov blok-beketti aınalyp, ken ornyna qaraı baǵyt alǵan «Lada Granta» avtokóligin baıqapty. Polıseı bul týraly basshylyqqa habarlap, ózi toqtatý úshin atalǵan kólikke bet alǵan. Sol sátte oǵan kómekke áriptesteri kómekke keldi.

– Polıseıler Qulsary qalasynda turatyn 31 jastaǵy azamattyń basqa­rýyndaǵy kólikti vahtalyq kentke ki­re­beriste toqtatty. Kólik salonynda júr­gizýshiden ózge tórt er adam bolǵan. Olardyń ekeýi Orynbor qalasynda turatyn Reseı Federasııasynyń azamaty bolyp shyqty. Qujattardy tekserý kezinde úsh jolaýshynyń, onyń ishinde bir reseılik azamattyń qolynda PTR-testten ótkeni týraly anyqtama bolmady. Kóliktegiler «Teńiz» vahtalyq kentiniń aýmaǵynda ornalasqan kompanııalardyń birine barýdy kózdegen, – dep habarlady oblystyq polısııa departamentiniń baspasóz qyzmeti.

Oblystyń memlekettik bas sanıtar dárigeri Amantaı Jumaǵalıevtiń aıtýyna qaraǵanda, qaýipti indetti juq­tyrýshylardyń 80 paıyzyn vahtalyq aýysymmen ózge óńirlerden jumysqa kelgen azamattar quraǵany anyqtaldy. Demek, keı kompanııalar karantındik shekteý sharalaryn saqtaýǵa mán bermeıdi. Sonyń qatarynda «Maten Petrolıým» JShS bar.

– Bıylǵy 7 jeltoqsanda qalada in­detke shaldyǵýdyń joǵary deńgeıi – 19 jaǵdaı tirkeldi. Al oblys boıynsha – 61 jaǵdaı. Onyń ishinde 19 naýqastyń ekeýi – Atyraý qalasynyń turǵyndary, qalǵan 17-si – kompanııalardyń biriniń vahtalyq aýysymǵa kelgen qyzmetkerleri. Qa­lalyq sanıtarlyq-epıdemııalyq ba­qylaý basqarmasynyń qyzmetkerleri júrgizgen epıdemııalyq tekserý kezinde «Maten Petrolıým» kompanııasynyń qyzmetkerleri vahtaǵa barý úshin PTR-taldaýyn tapsyrǵany anyqtaldy. So­nymen qatar jumysqa kirisý úshin qyz­metkerler karantındik stasıonarda 7 kún jatýy kerek. Al 7-shi kúni PTR-tal­­daýdy tapsyrýy tıis. Eger PTR-tal­­daýy teris bolsa, olar jumysqa ji­­be­riledi, – deıdi Atyraý qalalyq sanı­­tar­lyq-epıdemııalyq baqy­laý basqar­ma­sy­nyń basshysy Qanat Ǵaı­nedenov. – Kompanııa qyzmetkerleri ornalasqan qonaq-úılerdiń jaǵdaıy sanıtarlyq normalar men ere­jelerdiń talaptaryna sáıkes kelmedi. Sonymen birge basshylar da, qyzmetkerler de jumysshylardy karantınge ornalas­tyrǵany týraly habardar etpedi. О́ıt­keni kelisimshartta jaı turý týraly kórsetilgen. Al qyzmet­kerlerdiń jaǵ­daıyn baqylaý úshin medısınalyq qyzmetkerler bolǵan joq.

Onyń aıtýynsha, qonaqúıge ornalas­qandarǵa arnalǵan jeke qorǵanys quraldary shekteýli mólsherde berilgen. «Maten Petrolıým» jumysshylarynyń ózderi qonaqúıde erkin qozǵalyp, birge tamaqtanypty. Tipti oqshaýlaý talaptaryn buzyp, bir bólmede eki-úsh adam turǵan. Al naýqastarmen baılanysta bolǵan segiz adam qonaqúıden múldem ketip qalǵan. Shekteý sharalaryn buzǵan osyndaı derekke baılanysty «Maten Petrolıým» kompanııasyna ákimshilik quqyqbuzýshylyq týraly hattama toltyrylyp, 1600 AEK (3 644 800 teńge) mólsherinde aıyppul salyndy.

Mine, osyndaı sebepter Atyraý obly­synyń «qyzyl aımaqqa» enýine yqpal etip otyr. Buǵan qosa oblystyń memlekettik bas sanıtar dárigeri A.Jumaǵalıevtiń qaýlysymen karantındik shekteý sharalary qaıta kúsheıtildi.

– Atyraý oblysynyń aýmaǵynda epı­demııalyq jaǵdaı turaqtalǵanǵa deıin sharýashylyq, ózge de qyzmetpen jáne halyqtyń tynys-tirshiliginiń erekshe jaǵdaılarymen shekteý sharalary engizilsin. Shekteý is-sharalarynyń re­jimi men merzimderi oblys aýmaǵynda COVID-19 koronavırýs ınfeksııasynyń taralýy boıynsha ahýaldyń ózgerýine sáıkes qaıta qaralýy múmkin, – delingen qaýlyda.

Bas sanıtardyń qaýlysyna sáıkes Teńiz ken ornynda karantındik jáne shekteý sharalary epıdemııalyq jaǵdaı turaqtalǵanǵa deıin uzartyldy. Al óńir turǵyndaryna respıratorlyq ınfeksııanyń alǵashqy belgileri paıda bolǵan kezde (qurǵaq jótel, qyzba, tynys alýdyń qıyndaýy, entigý jáne t.b.) medısınalyq uıymdarǵa barmaı, 103-ke qońyraý shalý arqyly úıden medı­sınalyq kómekke júginý, qoǵamdyq tamaqtaný oryndarynda tamaqtaný kezin­de áleýmettik araqashyqtyqty saqtaı otyryp jáne 5 (bes) jasqa deıingi balalardy kospaǵanda, qoǵamdyq oryndarda, barýǵa jáne demalýǵa arnalǵan oryndarda, qoǵamdyq kólikterde medısınalyq nemese mata betperdelerin kııý mindetteldi. Jasy 65-ten asqan adamdarǵa azyq-túlik, dári-dármek pen medısınalyq buıymdardy, sondaı-aq qajetti taýarlardy satyp alý­dy jáne medısınalyq mekemelerge barýdy qospaǵanda asa qajettilik bolmasa, turǵylyqty jerinen shyqpaýǵa usy­nyldy. Sonymen birge turǵyndar halyq kóp shoǵyrlanatyn jerlerge bar­maýy, áleýmettik araqashyqtyqty, betperde tártibin, jeke bas gıgıenasyn saqtaýy tıis.

Bas sanıtar dárigerdiń qaýlysymen jergilikti ákimdikterge kópshilik is-sharalardy (merekelik, oıyn-saýyq, kópshilik mádenı, sporttyq, bilim berý is-sharalaryn, kórmelerdi, korporatıvti, forýmdardy, konferensııalardy, son­daı-aq otbasylyq, estelik is-sharalardy (banketter, úılený toılary, mereıtoılar, eske alý jáne t.b.), onyń ishinde úıde jáne jappaı adamdar jınalatyn ózge de is-sharalardy ótkizýge ty­ıym salý usynylyp otyr. Munyń qata­ryn­da oıyn-saýyq obektileriniń, banket zaldarynyń, barlyq túrdegi oıyn alańdary (aýlalardy qospaǵanda), túngi klýbtardyń, barlar, karaoke, kom­pıý­­terlik jáne oıyn klýbtarynyń, kalıan, býkmekerlik keńselerdiń, me­re­kelerdi uıymdastyrý boıynsha keı­terıngtik qyzmetterdiń, menshik nysanyna qaramastan mektepke deıingi balalar mekemeleriniń (kezekshi toptardy qospaǵanda), mádenı nysandardyń, jeke, toptyq daıyndyqtardy qosa alǵanda kınoteatrlardyń, teatrlardyń qyzmetin toqtata turý da bar.

Sońǵy táýlikterde «qyzyl aımaq­ta» qalǵan jalǵyz óńir – Atyraý ob­lysyndaǵy turǵyndardy alańdatqan epıdemııalyq ahýaldyń betalysy osylaı qattalyp otyr. Karantındik shekteý sharalarynyń qaıtadan kúsheıtilýi qaýipti indettiń betin qaıtara ala ma? Ázirge buǵan boljam jasaýǵa eshkimniń júregi daýalar emes.

Atyraý oblysy