Nur-Sultanda jańa jyldyq fleshmob bastaldy. Jańa jylǵa qaraı elordada qala turǵyndary birigip, alty metrlik eko-shyrsha toqıtyn bolady.
«Karantın shekteýleri men oqshaýlaý qol qýsyryp otyrýǵa sebep emes. Úıde otyryp, shyǵarmashylyqpen aınalysa alasyz, ómir boıy armandaǵan nárseni úırene alasyz. Toqylǵan jyly shyrsha adamdardy biriktiredi – jańa jyldyq atmosferany týdyryp, 2021 jyldy jumyla qarsy alýǵa múmkindik beredi», - dep atap ótti aksııa uıymdastyrýshysy, áleýmettik kásipker Rahıma Muqysheva.
«Bıyl bizge Nur-Sultan qalalyq ákimdik qoldaý kórsetti. Biz toqyma jip satyp aldyq. Demeýshiler de paıda bolady. Bul joly aksııaǵa Petropavl, Atyraý jáne Taraz qosyldy. Búkil Qazaqstan bizdiń shyrshany jumyla toqyp jatyr. Sonymen qatar, mektepter de qatysady. Biz qazir "Qoldaý" qoǵamdyq birlestigimen jumys istep jatyrmyz, olar qazirdiń ózinde mektepterge sheberlik synyptaryn uıymdastyryp jatyr»,- dedi Rahıma Muqysheva.
Jańa jylǵa arnalǵan erekshe shyrshanyń «bólshekterin» jasaýǵa barlyǵy qatysa alady. Kún saıyn 19-25 jeltoqsan kúnderi saǵat 10:00-den 15:00-ge deıin «Báıterek» monýmentiniń ishinde barlyq sanıtarlyq normalardy saqtaı otyryp, toqýdan sheberlik synyptary ótkiziledi.
«Quraq Kórpe stılindegi eko-shyrsha» jobasy daǵdarys kezeńindegi ózekti máselelerdi sheshýge kómektesedi. Olardyń biri – jastardy, ásirese az qamtylǵan, jumyssyz, múgedek jáne áleýmettik osal toptardyń basqa da sanattaryndaǵy jastardy oqýǵa, qosymsha tabys alýǵa, úıden jumys isteýge, shaǵyn óndiristi jáne kreatıvti ekonomıkany damytýǵa yntalandyrý. Sonymen qatar, toqý jumystary paıdaly demalys syılap, stress pen depressııany jeńildetýge kómektesedi.Toqyma jipten jasalǵan jańa óner týyndysynyń bıiktigi - alty metr. Toqyma áshekeılerdi jasaýǵa mektep oqýshylary men olardyń ata-analary, qarttar úıiniń zeınetkerleri, balalar úıleri, qoǵamdyq qorlar qatysady. Shyrshany bezendirýge arnalǵan zattar da 20/20 santımetr túrli-tústi toqylǵan kvadrattardan jasalǵan.
Joba aıasynda toqylǵan japsyrmalardy eń kóp toqyǵan rekord ıesi anyqtalatyn bolady. Sondaı-aq qundy syılyqtar men lotereıa oınatylady. Lotereıaǵa qatysý úshin tórt kvadrattan baılaý kerek. Barlyq elementter "Quraq Kórpe" dástúrli qazaq tehnıkasy boıynsha biriktiriledi.
Fleshmobty Nur-Sultan qalasy ákimdiginiń qoldaýymen «Pýt masterstva» qoǵamdyq qory men «Bergen» áleýmettik sheberhanasy uıymdastyrdy. Joba «Rýhanı jańǵyrý» ulttyq baǵdarlamasy aıasynda Qazaqstandaǵy eriktiler jylyna oraı uıymdastyryldy.