Búgin Taraz qalasyndaǵy «Dostyq» úıinde Ábý Nasyr ál-Farabıdiń 1150 jyldyǵy men Abaı Qunanbaıulynyń 175 jyldyǵyna oraı «Ál-Farabı jáne Abaı: ulylar úndestigi» atty ǵylymı-tájirıbelik konferensııasy ótti, dep habarlaıdy Egemen.kz.
Atalǵan rýhanı jıyndy Jambyl oblysynyń ákimi Berdibek Saparbaev sóz sóılep ashyp, júrgizip otyrdy.
Áýeli óz sózinde Qazaqstan Jazýshylar odaǵy basqarmasynyń tóraǵasy Ulyqbek Esdáýlet bul mereıtoıdyń búkil qazaq halqy úshin ǵana emes, búkil túrki dúnıesine ortaq mereıtoı ekenin, sondyqtan da qos alyptyń toılary - ultymyz úshin rýhanı órleý jolyndaǵy uly mereke dep esepteıtinin jetkizdi. Sonymen qatar, ál-Farabı atyndaǵy qazaq ulttyq ýnıversıtetiniń rektory, akademık Ǵalymqaıyr Mutanov uly tulǵalardyń urpaq úshin oryny árdaıym mańyzdy ekenin atap ótti.
Sonymen qatar, Ǵalymqaıyr Mutanov qos alyptyń rýhanı álemindegi jańashyldyqtar, rýhanı silkinis, jalpy olardyń uly bolmysy haqynda oı qozǵady. Al, jalpyulttyq «Egemen Qazaqstan» gazetiniń Basqarma tóraǵasy, Halyqaralyq Túrki Akademııasynyń prezıdenti Darhan Qydyráli áýeli bıylǵy jyly Memleket basshysy Qasym-Jomart Toqaevtyń pármenimen elimizde ál-Farabı jáne Abaı syndy uly tulǵalardyń mereıtoıy atalyp ótip jatqanyn, ál-Farabı álemdik aqyl oıdyń alyby bolsa, Abaı hakim Alash aqyl-oıynyń temirqazyǵy ekenin jetkizdi. Sonymen qatar, Darhan Qydyráli bıylǵy jyly «Egemen Qazaqstan» gazetinde uly tulǵalar haqynda kóptegen ǵalymdardyń eńbekteri jarııalanǵanyn, jalpy, eki alyptyń úndestigi "Tolyq adam" ilimi týraly da aıtyp ótti. Ásirese jastardyń izgi adam bolýǵa qulshynysyn arttyrýǵa, jat ádetterden arylýǵa jetelýge ál-Farabı men Abaı syndy uly tulǵalardyń úlesiniń zor ekenin aıtty.
Sondaı-aq L.Gýmılev atyndaǵy Eýrazııa ulttyq ýnıversıtetiniń rektory, akademık Erlan Sydyqov Abaı álemin ashyp kórsetý maqsatynda atalǵan oqý ordasynda kóptegen jumystar atqarylǵanyn aıtsa, Abaı atyndaǵy Qazaq ulttyq pedagogıkalyq ýnıversıtetiniń rektory Tahır Balyqbaev uly ál-Farabıdiń rýhanı álemin ashyp kórsetýde Aqjan Mashanov, Abaıdy tanytýda Mekemtas Myrzahmetov sııaqty ǵalymdardyń ólsheýsiz eńbek etkenin, sondyqtan da qazaq qoǵamy úshin qos alyptyń esimi ajyramas uǵym ekenin jetkizdi. Al, M.H.Dýlatı atyndaǵy Taraz óńirlik ýnıversıteti qazaq tili men ádebıeti kafedrasynyń oqytýshysy, abaıtanýshy Rahat Salamatova da Abaıdyń máńgi óshpes, ólmes rýhanı qubylys ekenine toqtaldy.
Jıyndy oblys ákimi Berdibek Saparbaev búgingi konferensııa barysynda uly tulǵalarymyz týraly tyń derekter aıtylyp, óreli áńgime órbigenin aıta kelip, qurmetti qonaqtarǵa ýaqyt bólip konferensııaǵa qatysqandary úshin alǵys bildirdi.