Qyzylorda oblysy ákimi Gúlshara Ábdiqalyqova jumys saparymen Syrdarııa aýdanyna bardy. Bul týraly oblys ákimdiginiń baspasóz qyzmeti habarlady.
Sapar barysynda aımaq basshysy memlekettik baǵdarlamalardyń oryndalý barysyn tekserip, «Jumyspen qamtý jol kartasy» sheńberinde Tereńózek kentiniń turǵyn kvartalyndaǵy 18 páterli №1 turǵyn úı jáne 6 páterdi japsarlastyrý arqyly salynǵan 18 páterli №2 turǵyn úıdiń kiltin tapsyrý rásimine qatysty.
«Jańa jyl merekesi qarsańynda jańa turǵyn úıdi paıdalanýǵa bergeli turmyz. Búgingi kúni memlekettik baǵdarlamalar aıasynda ınfraqurylymdy damytý, turǵyn úıdiń qurylysyn júrgizý, abattandyrý sekildi kóp degen aýqymdy jumystar atqarylýda. Qonystaryńyz qutty bolsyn! Jańa úılerińizdiń ishi qýanysh pen shattyqqa tolsyn!», dedi oblys ákimi Gúlshara Ábdiqalyqova.
Aıta keteıik, bul jobanyń quny 466 mıllıon 195 myń teńgeni quraıdy. Páter sany – 42. Qurylys jumystaryn merdiger mekeme «Nur-Talap ı K» JShS aǵymdaǵy jyldyń maýsym aıynda bastaǵan. Jalpy aýdany 2593,6 m2.
Syrdarııa aýdanynda jyl kóleminde «Jumyspen qamtý jol kartasy» sheńberinde A.Toqmaǵambetov aýyldyq okrýgindegi №135 orta mekteptiń jertólesin jattyǵý zalyna aınaldyrý jáne jalpy uzyndyǵy 34,7 shaqyrymdy quraıtyn eldi mekenderiniń ishki kósheliriniń jol qurylysyn júrgizý, Jetikól eldi mekeninde sýmen jabdyqtaý júıesin qaıta jańǵyrtý jáne keńeıtý, Tereńózek kentindegi jańa yqsham aýdanyna ınfraqurylym jetkizý, «Aýyl El besigi» baǵdarlamasy boıynsha Aqjarma aýylynyń kóshelerin ortasha jóndeý, jaryqtandyrý sııaqty jumystar atqarylyp jatyr.