Nur-Sultanda halyqtyń áleýmettik osal toptary sanatyndaǵy 300-den astam otbasy páter kiltterin aldy.
Olardyń arasynda jetim balalar, 1 jáne 2 top múgedekteri, erekshe qajettilikteri bar balalardy tárbıelep otyrǵan otbasylar, zeınetkerler, tolyq emes otbasylar, UOS ardagerlerine jeńildikter boıynsha teńestirilgender jáne t.b. bar.
Elordada Memleket basshysynyń tapsyrmasy boıynsha bıyl qoljetimdi turǵyn úı qurylysynyń kólemi úsh ese ulǵaıtyldy. Qazirdiń ózinde 7 myńnan astam áleýmettik páter úlestirildi, olardyń bir bóligi Turǵyn úı qurylys jınaq bankiniń kezeginde turǵandar. Is qaǵazdaryn júrgizý jáne páter alǵan azamattardy kezekten shyǵarý boıynsha jumystyń sońǵy kezeńi júrgizilýde.
«Jańa jyl qarsańynda qalalyqtardyń taǵy bir bóligi jańa qonys ıeleri atandy. Jańa jyldy jyldar boıy kútken páterlerińizde qarsy alasyzdar. Úıdiń ornalasqan jeri óte yńǵaıly, ózen jaǵasynda. Jaqyn jerde keń aýlalar, mektep jáne balabaqshalar bar. Úılerińiz tek qýanyshty oqıǵalarǵa toly bolsyn!», - dedi ákimniń orynbasary Nurlan Nurkenov kiltti saltanatty tapsyrý kezinde.
Elorda ákimi Altaı Kólginovtiń tapsyrmasy boıynsha bıyl birqatar turǵyn úı baǵdarlamalaryna ózgerister engizildi, mysaly, Qazaqstan ıpotekalyq kompanııasymen birlesip júzege asyrylǵan turǵyn úı baǵdarlamasyna sáıkes, bilim jáne densaýlyq saqtaý salasynyń qyzmetkerlerinen basqa órt sóndirýshiler, áleýmettik qyzmetkerler, mádenıet jáne sport qyzmetkerleri, polısııa qyzmetkerleri de áleýmettik páter alýshylar tizimine engizildi. Sonymen qatar turǵyndardyń áleýmettik jaǵynan osal toptarynyń barlyq sanattary turǵyn úı sertıfıkatyn alýshylar tizimine engizildi. 2021 jyldan turǵyn úı sertıfıkattarynyń kólemin 1 mıllıonnan 1,5 mıllıon teńgege deıin arttyrý josparlanýda.
«Jyldap kútken jańa páterlerine kóship jatqan ár otbasyna qýanyshtymyz. El basshylyǵy baspana máselesine erekshe nazar aýdarady. 2021 jyldyń basynda biz turǵyndardyń áleýmettik osal toptarynan kezekte turǵandarǵa páter kiltterin tabystaımyz.
2021 jyly biz qazirgi rekordtyq qarqyndy ustap qana qoımaı, qoljetimdi turǵyn úı qurylysynyń kólemin ulǵaıtamyz. Men sondaı-aq qıyn jyl bolǵanymen jumysyn jalǵastyrǵan qurylysshylarymyzǵa alǵys aıtamyn», - dedi elorda ákimi Altaı Kólginov.