Jazýshy, halyqaralyq «Alash» ádebı syılyǵynyń laýreaty Nurjan Qýantaıulynyń «Qazaq ádebıeti» gazetinde jarııalanǵan «Úreıli úsh kún» atty áńgimesi oqyrman qaýymnyń nazaryn aýdaryp, birshama ýaqyt boıy áleýmettik jelide talqylandy.
Qazaq ádebıetine jańa bir tynys bolyp sezilgen bul shyǵarma antıýtopııa janrynda jazylǵan. Mazmuny da, formasy da ózgeshe stıldegi hám bolashaqty boljaǵan áńgimeniń aýany erek, oqıǵasy aýyr. Bul týraly avtordyń ózi: «Úreıli úsh kún» áńgimesiniń birneshe astary bar, ony tolyq kórsetý úshin arnaıy taldaý jasaý kerek bolady. Ásili, antıýtopııa (nemese dıstopııa) janry – shetel ádebıetinde suranysqa ıe janr. Bul janr qısyq aına sııaqty, oqyrmanǵa qazir kim ekenimizdi nemese keleshekte qaıda baryp at shaldyratynymyzdy kórsetip ketedi. Álemdik klassıka dep sanalatyn «1984» nemese «Farengeıt boıynsha 451 gradýs» antıýtopııa romandarynyń áli kúnge deıin oqylatyny sodan bolsa kerek (ókinishtisi, osyndaı shyǵarmalar qazaq tiline aýdarylmaı jatyr). Al adamzat qoǵamy úlken ózgeris qarsańynda tur, aldymyzda áleýmettik, tehnogendik problemalar bar ekeni taǵy belgili. Sol zamanǵa jetkende adam óziniń adamshylyǵyn saqtaı ala ma, joq pa, «Úreıli úsh kún» osy máselelerge jaýap izdeıdi», deıdi. Al ádebıetshi, synshy Amangeldi Keńshilikuly bul áńgimeniń qazaq prozasyna beles bolatynyn aıtady. «Antıýtopııa kóptegen qazaq qalamgerleriniń tisi batpaı júrgen qıyn janr edi. Kezinde bárimiz de Kobo Abeniń «Basa-kóktep kirgender», Evgenıı Zamıatınniń «Biz» shyǵarmalaryn súısinip oqyǵan bolatynbyz. Osydan birneshe jyl buryn Nobel syılyǵyn enshilegen Kadzýo Isıgýronyń eń myqty shyǵarmasy da onyń «Qol úzbe menen» dep atalatyn antıýtopııalyq romany. Nurjannyń myna áńgimesi dál búgingi tańdaǵy qazaq prozasy úshin úlken jańalyq», dedi.
Erlan JÚNIS, Marjan Ábish,
«Egemen Qazaqstan»