Talas aýdany, Qarataý qalasynyń turǵyny Aıajan Jýataı óziniń bar múmkindigin ónerge arnap kele jatyr. Erekshe jaratylǵan qarshadaı qyz qalamdy tistep otyryp, alýan túrli sýret salady.
Osy qabileti arqyly ol respýblıkalyq, oblystyq baıqaýlardyń da birneshe ret júldegeri atanypty. Jas bolsa da erekshe qabiletke ıe arý qyz óziniń óneri arqyly kópti tańdandyryp keledi.
Sýretshi qyzdyń ómirdiń ózindeı shynaıy týyndylary adam janynyń qupııasyna úńilip, júregin keremet bir sezimge bóleıdi. Al toqyǵan kestesi men monshaqtarmen ádiptep jasaǵan túrli áshekeı buıymdary kórgen kózdi qyzyqtyrady. Múmkindigi shekteýli bolsa da bar múmkindigin qazaq ónerin damytýǵa arnap kele jatqan Aıajannyń josparlary kóp. Ásirese onyń ómirge, ónerge degen qushtarlyǵy eshkimge uqsamaıdy. Qaısar qyz jaratylysynyń ónerge qushtar ekenin, sondyqtan da taǵdyryna eshýaqytta nalymaǵanyn aıtady. «Sebebi meniń eki qolym men aıaǵym damymasa da, estý, kórý qabiletterim erekshe. Sýret salý men keste toqýdan bólek, janyma jaqyn aqyn-jazýshylardyń shyǵarmalaryn oqyǵandy jaqsy kóremin. Nege ekeni belgisiz, sýretti túnde salǵan unaıdy. Kompıýterdi jaqsy meńgergenmin», deıdi. Sondaı-aq Aıajan janyna jaqyn jandardyń qamqorlyǵy men demeýine de dán rıza ekendigin jetkizdi. «Men úshin atqan tań men batqan kúndi, anamnyń aq júzin kóre alatynym, saf aýamen tynystaı otyryp, oıymdy jetkizý úlken baqyt. Eń bastysy – elimiz álemdi jaılaǵan myna indetten aman shyqsa eken dep tileımin. Adamdar densaýlyqtyń qadirin bilip, aqshamen de satyp ala almaıtyn dúnıelerdiń bar ekenin tereń túsinse deımin», deıdi Aıajan.
Jambyl oblysy