Parlament Májilisiniń Tóraǵasy Nurlan Nyǵmatýlın elordaǵy #111saılaý ýchaskesinde Parlament Májilisiniń depýtattaryna daýys berdi, dep habarlaıdy Egemen.kz
Bul saılaý ýchaskesi Ulttyq Akademııalyq kitaphananyń ǵımaratynda ornalasqan.
– Parlamenttiń altynshy shaqyrylymy kezinde aýyz toltyryp aıtýǵa bolatyn aýqymdy jumystar atqaryldy. Nátıje jaqsy boldy. Kóptegen zańdar qabyldandy. Partııamyzdyń Tóraǵasy, Elbasy Nursultan Nazarbaevtyń strategııalyq baǵytynda, Memleket basshysy Qasym-Jomart Toqaevtyń halyqqa Joldaýynda kóterilgen bastamalar men tapsyrmalardyń barlyǵy jan-jaqty oryndaldy. Al endi jetinshi shaqyrylymnyń depýtattary osy jumystardy jalǵastyryp, bolashaqta elimizge qajet zańdardy qabyldaıdy dep senim bildiremin. Osy saılaý ýchaskesine kire beriste baıqaýshylarmen kezdestim.
Olar saılaý ýchaskeleriniń tańerteń erte ashylǵanyn, saılaýshylar joǵary belsendilik tanytyp, jaqsy kóńil kúımen kóptep kelip jatqanyn jetkizdi. Sondyqtan, saılaý jumysy ádil ári ashyq ótedi dep senemin, – deıdi Nurlan Nyǵmatýlın.
Aıta keteıik, Nur-Sultan qalasyndaǵy 3690 daýys berýshi osy ýchaskede tirkelipti.