Qaraǵandy oblysy boıynsha 778 saılaý ýchaskesi ashylyp, partııalar atynan úsh myńnan astam azamat senim bildirilgen adam retinde tirkeldi. Barlyq ýchaskelerde pandemııa jaǵdaıynda daýys berý úshin qaýipsiz sanıtarlyq jaǵdaı jasaldy.
Saılaý kúni Qaraǵandy oblysynda TMD Parlamentaralyq Assambleıasy atynan halyqaralyq baıqaýshylar toby jumys istedi. Olar tań atysymen kenshiler astanasynda jáne oblystyń basqa qalalaryndaǵy saılaý ýchaskelerine baryp, saıası is-sharanyń barysyn qadaǵalady.
Baıqaýshylardyń biri, Kýzbass parlamentiniń depýtaty, Kemerovo memlekettik ýnıversıtetindegi Otan tarıhy kafedrasynyń meńgerýshisi Alekseı Zelenın saılaý barysy týraly aıtqanda saıası naýqannyń joǵary deńgeıde ótkenin atap ótti.
– Qaraǵandy oblysynda jumys istegen delegasııamyzdyń quramynda alty adam boldy. Oblys ortalyǵyndaǵy birneshe saılaý ýchaskesinde, sondaı-aq basqa qalalarda da boldyq. Saılaýdyń Qazaqstan Respýblıkasynyń zańnamasy saqtala otyrylyp, qalypty jaǵdaıda ótkenine kýá boldyq. Saılaýshylardyń óz tańdaýlaryn erikti túrde jasaýyna eshqandaı kedergi bolmady. Eń bastysy, epıdemııalyq qaýipsizdik sharalary saqtalyp, barlyq ýchaskeler jeke qorǵanys quraldarymen qamtamasyz etildi, – dep atap ótti reseılik baıqaýshy.
Qaraǵandy ekonomıkalyq ýnıversıtetinde ornalasqan №66 saılaý ýchaskesiniń basshysy Saıran Ulaqov alǵashqylardyń biri bolyp 85 jastaǵy aqsaqaldyń daýys bergenin aıtty.
– Bizdiń ýchaskede 80 jastan asqan 90-ǵa jýyq adam bar. Olardyń bárine aldyn ala telefon soǵyp, habar berdik. Qarııalardyń kóbi óz aıaǵymen kelip, daýys berdi. Jaǵdaılary kelmegenderine arnaıy mamandar baryp, olar úılerinde óz tańdaýlaryn jasady. Árıne, pandemııa óz degenin istedi. Eń bastysy, saılaý ýchaskesinde sanıtarlyq is-sharalar qatań saqtaldy. Daýys berý zalynda ylǵaldy tazalaý, kvarstaý, jeldetý jumystaryn júrgizdik. Sondaı-aq ýchaskede eriktiler kezekshilik etti. Olar kelýshilerge erejelerdi túsindirip otyrdy jáne múmkindigi shekteýli adamdarǵa kómektesti, – dedi ol.
Ortalyq saılaý komıssııasynyń deregine sensek, Qaraǵandy oblysy boıynsha túske deıin saılaýshylardyń 33,5 paıyzy ýchaskelerge kelip, óz tańdaýlaryn jasaǵan eken. Tústen keıin de óńir turǵyndary belsendilik tanytyp, saıası naýqannyń uıymshyldyqpen ótýine óz úlesterin qosty.
Qaraǵandy oblysy