Senat depýtattary Nurlan Beknazarov pen Aıgúl Qapbarova Shymkentke sapary barysynda qalaǵa qosylǵan Maıatas jáne Toǵys eldi mekenderiniń turǵyndarymen kezdesti. Munda 20 myńǵa jýyq adam turady, dep habarlaıdy Egemen.kz.
Kezdesýde turǵyndar sońǵy jyldary Maıatas pen Toǵysty damytý úshin kóptegen jumystar atqarylǵanyn aıtty. Turǵyndardyń aıtýynsha, búgingi tańda barlyq joldar men trotýarlar tolyǵymen asfalttalyp, kóshelerge jaryq berildi jáne aýlalar abattandyryldy. Balalarǵa arnalǵan oıyn alańdary men sport alańdary ashyldy. Elektr jelileri men transformatorlar jańartyldy.
Kezdesý barysynda jergilikti ardagerler keńesiniń tóraǵasy senatorlarǵa ózekti máselelerdi ortaǵa saldy. Onyń aıtýynsha, Maıatas turǵyndarynyń keıbir úıleri qala quramyna ótken, al aýyl sharýashylyǵy jerleri Túrkistan oblysy Tólebı aýdanynyń qaramaǵynda qalyp otyr. Sonyń saldarynan fermerler sýbsıdııalar men basqa da memlekettik qoldaýǵa qol jetkize almaı qaldy. Ol sondaı-aq jyl saıyn kóktemde Badam ózeniniń saldarynan bolatyn sý tasqyny qaýpiniń aldyn alý jónindegi jumysty kúsheıtý qajettigin atap ótti.
Senat depýtattary bul problemalardy baqylaýǵa alatyn boldy. Turǵyndarmen áńgime barysynda senatorlar Parlament jumysynyń qorytyndylary týraly aıtyp berdi. О́tken jyly 110 zań qabyldanǵany jáne olardyń kópshiligi halyqtyń áleýmettik jaǵdaıyn jaqsartýǵa baǵyttalǵany atap ótildi. El bıýdjetiniń basym bóligi bıylǵy jyly áleýmettik salany damytýǵa, ıaǵnı qazaqstandyqtardyń ál-aýqatyn arttyrýǵa baǵyttalatyn bolady.
Senatorlar sapar aıasynda qalanyń medısınalyq ortalyqtarynyń birinde boldy. Ortalyqta memlekettik tapsyrys esebinen jergilikti emhanalardyń joldamalary negizinde halyqtyń 80%-y tegin em alady. Depýtattar óz kezeginde qajetti jáne bilikti medısınalyq kómekti ýaqytyly alýdyń mańyzdylyǵyn atap ótti.