Túrme – jazasyn óteý arqyly qaıta tárbıeleý orny. Jazasyn óteýshiler abaqtyda túrli kásip meńgerip, buryn óz boıynan baıqamaǵan sheberlik syndy qabiletterin ushtap, jetildirip shyǵýy múmkin. Sottalǵandar jazasyn óteý barysynda jer baptap, aǵash pen baý-baqsha ósirse, endi bireýleri kózdiń jaýyn alatyn kúndelikti qoldanysqa qajetti, sondaı-aq sándik aǵash buıymdaryn jasap qýantady. Jýyrda Mańǵystaýdaǵy kolonııada buryn bolmaǵan kásip túri tusaýyn kesip, endi jazasyn óteýshiler óz qoldarymen báteńke tigýdi bastady.
Aqtaýdaǵy GM-172/6 mekemesinde qoldan jasalǵan aıaqkıim shyǵaratyn seh ashyldy. Búgingi tańda sehtyń óndiristik qýaty aıyna 40 jup aıaqkıim shyǵarýǵa múmkindik beredi. «Eńbek-Batys» RMK kásipornynyń aıaqkıim sehyna ázirge tek úsh sottalýshy jumysqa ornalastyryldy, qazirgi tańda kásiporyn óndiristi keńeıtý týraly máseleni oılastyrýda.
Seh basshysynyń aıtýynsha, olar jańa óndiristi endi ǵana ıgere bastaǵan. Barlyq ónim bylǵarydan jáne qolmen jasalady. Bir jup qysqy aıaqkıimniń baǵasy shamamen 10 600 teńgeni quraıdy.
– Sottalǵandardyń ózderi munda jumys istegendi unatady, óıtkeni bul jańa óndiris, buryn bul mekemede aıaqkıim jasalmaǵan. Árbir jeke danamen jumys jasaı otyryp, olar qazir modelderdi jaqsartý úshin óz ıdeıalaryn usynady, keıde tipti tájirıbe jasaıdy. Damýdyń alǵashqy kezeńderinde biz óz ónimderimizben Mańǵystaý oblysynyń qylmystyq-atqarý júıesin barynsha qamtamasyz etý mindetin qoıdyq. Jaqyn arada biz óndiristiń ósýin jáne erkin naryqqa shyǵýdy baqylaı alamyz dep úmittenemiz, – dep josparlarymen bólisti RMK-niń óndiris jónindegi basshysy Ǵanı Iýsýpov.
Ári jazasyn ótep, ári qoǵamǵa paıdaly ispen aınalysýyna múmkindik berý, sondaı-aq olardyń boıyndaǵy qabiletin oıatyp, sheberlikterin shyńdaý – sottalǵandardy izgi nıetke tárbıeleýdegi, jaqsylyqqa umtyldyrýdaǵy zor eńbekterdiń biri.
Mańǵystaý oblysy