Arqaǵa aty máshhúr dáýlesker kúıshiniń biri – Aqqyz Ahmetqyzy. Bul kisi ataqty Táttimbettiń kúıshilik dástúrin jalǵastyryp, Qalı Baıjanov, Manarbek Erjanov syndy óner sańlaqtarynan tálim-tárbıe alǵan. Aqqyz óz janynan «Qaıran elim», «Aqqyz», «Jetim qyz» jáne «Qosbasar» atty kúıler de shyǵarǵan eken.
Búgin Balqash qalalyq tarıhı-ólketaný mýzeıinde kúıshi Aqqyzdyń gıpsten soǵylǵan músini saqtaýly tur. «Kúıshi músininiń avtory – Aqtoǵaı óńiriniń sýretshisi Jomart Ibraev. Al jádigerdi murajaıǵa 2008 jyly Ábdirahmanova degen áıel kisi tapsyrǵan degen derek bar», deıdi mýzeıdiń bas qor saqtaýshysy Asyl Ihashova.
Kúıshi Aqqyzdyń músinin jasaýǵa sýretshiniń dostary Qajyken Kúlteıbaıuly men Shákızat Moldasheva sebepker bolǵan eken. Jomart Ibraev dostarynyń ótinishin qabyl alyp, músindi 1989-1990 jyldar aralyǵynda jasap shyǵarǵan.
Kúıshi bıýsti daıyn bolǵannan keıin, avtor belgili sebeptermen Almatyǵa qonys aýdarǵan da, týystary músinnen kóz jazyp qalǵan. Arada biraz jyldar ótkennen keıin ǵana bıýst tabylyp, mýzeı tórinen oryn aldy.
Qaraǵandy oblysy,
Balqash qalasy