Qaza tapqan kisilerdiń kópshiligi egde jastaǵy adamdar. Olardyń kóbi úıleriniń shatyryn qardan tazartamyn dep jazataıym bolǵan jáne qar qursaýynda qalyp qoıǵan, dep habarlaıdy Egemen.kz «TASS» agenttigine silteme jasap.
Japonııa úkimeti qardy tazartýǵa resýrstar jetkiliksiz eldiń soltústik aımaqtaryna jedel qarjylyq kómek kórsetpek.
Seısenbide Tokıoda ótken press-konferensııada Memlekettik jerler, ınfraqurylym, kólik jáne týrızm mınıstri Kazýıosı Akaba úılerdi qardan tazartý kezinde 60-tan astam adam qaza tapty dep málimdedi.
«Úkimet qajetti mólsherdi tez eseptep, qardy qaýipsiz shyǵarýǵa kómek kórsetedi. Biz qar tazartý kezinde qaıtys bolǵandardyń sany kóbeıip ketkenine qatty alańdaımyz», - dedi ol.
Mınıstrdiń aıtýynsha, qurban bolǵandardyń sany 2017-2018 jyldary dál osyndaı sebeppen ajal qushqan adamdardyń sanynan áldeqaıda kóp.
Japonııanyń Honsıý aralynyń soltústiginde jáne soltústik Hokkaıdo aralynda ótken jyldyń jeltoqsan aıynan beri jaýǵan qar toqtaǵan joq. Qalyń qardyń saldarynan birneshe ret jol qozǵalysy toqtatylyp, kommýnaldyq qyzmetterdiń jumysy buzylǵan.
Joǵarydaǵy máselege oraı úkimet jergilikti bılikke bólingen resýrstardy birinshi kezekte halyqqa kómektesý úshin paıdalanýdy tapsyrdy.