Kúni keshe kenshiler astanasynda ústel tennısinen ótken Qazaqstan Respýblıkasynyń chempıonatynda nebári 13 jastaǵy qaraǵandylyq tennısshi Alan Qurmanǵalıev aıdy aspanǵa shyǵaryp, jekeleı synda jeńiske jetti.
Fınaldyq jekpe-jekte ol Batys Qazaqstan oblysy atynan tartysqa túsken saqa tennısshi Dastan Kenjeǵulovty tize búktirdi. Sóıtip ol eresekter arasynda chempıon bolǵan eń jas tennısshi atanyp, qazaq sportynyń shejiresine óz esimin jazdy.
Alan ústel tennısiniń álipbıimen jeti jasynda tanysypty. Jas balaǵa oıynnyń unaǵany sonsha, ol jattyǵý zalynan shyqqysy kelmeı, erteden keshke deıin tennıs oınaıdy eken. О́zi quralpy balalar bir, bir jarym saǵat jattyqsa, bul olardan eki ese kóp jumys isteıtin kórinedi. Balanyń mundaı qulshynysyn baıqaǵan Elmıra Álıeva syndy suńǵyla bapker oǵan birden nazar aýdaryp, qanatynyń astyna alǵan.
Álbette, jetkinshektiń mundaı talpynysy óziniń jemisin bermeı qoımady. Arada eki jyl ótkende jastary ózimen shamalas balalardy shań qaptyryp, el chempıony atandy. Al bir jyldan keıin Alan ózinen úsh-tórt jas úlken oıynshylardy túgel jeńip, Qazaqstan chempıonatynda top jardy. Sonymen birge ol ústel tennısinen elimizdegi eń jas sport sheberi ataǵyna da ıe boldy.
El ishinde ózine tótep bere alatyn qarsylas tabylmaǵan soń, jas daryn halyqaralyq dodalarda myqtylarmen kúsh synasa bastady. Ústel tennısine degen úlken mahabbat jáne erinbeı tókken terdiń jemisi Alan syndy alǵan betinen qaıtpaıtyn qaısar uldyń mereıin ósire túsken bolatyn.
Sol jyly ol tórt birdeı iri týrnırde jeńis tuǵyrynyń eń bıik satysyna kóterildi. Atap aıtqanda, Almaty qalasynda ótken respýblıkalyq irikteý jarysynda, odan keıin Bishkekte jalaý kótergen Ortalyq Azııa boıynsha dodada top jardy. Ile, Taılandta bolǵan Azııa qurlyǵynyń irikteý týrnırinde qarsylas shaq keltirmedi. Sonan soń Omanda ótken álemdik irikteý jarysynda taǵy da jeńis bıigine kóterilgen. Nátıjesinde, Alan Qurmanǵalıev Halyqaralyq ústel tennısi federasııasynyń (ITTF) sheshimimen Hopes Week qurlyqaralyq jáne álemdik týrnırleriniń qorytyndysy boıynsha 2019 jyldyń eń úzdik jasóspirim tennısshisi bolyp tanyldy!
«Atalǵan jańalyqty ınternetten bildim, – deıdi Alannyń ózi. – Árıne, qýanyshymda shek bolmady. Ol synda oıyn ústindegi eń úzdik tehnıka, shardy urý jáne ony zyr aınaldyrý syndy tásilder sarapqa túsken eken. Budan bólek, jattyǵýlardaǵy ynta men týrnırler arasyndaǵy tártip máselesi de qaralypty. Bul nátıje meniń mereıimdi ósire tústi. Sonymen birge, árıne, jaýapkershilik te júkteıdi».
Alan jastyǵyna qaramastan, jattyǵý ústinde bosańsýǵa jol bermeıtin óte yqtııatty, jaýapkershiligi zor bala eken. Bapkeriniń aıtqanyn eki etkizbeı oryndaıtyn tártiptiligi ony basqalardan erekshelendirip turatyn kórinedi. Iаǵnı oıyn balasy bolsa da jattyǵýda, týrnır barysynda óziniń baısaldy, sabyrly qalpyn meılinshe qatań saqtaı biledi eken.
«Alan – talantty ǵana emes, óte eńbekqor bala. Sonyń arqasynda joǵary kórsetkishterge qol jetkizip júr», deıdi onyń jeke bapkeri, Qazaqstannyń eńbek sińirgen jattyqtyrýshysy Elmıra Álıeva.
Jas darynnyń anasy Tatıana Perseva ulynyń ózine unaıtyn sport túrin adaspaı tapqanyna qýanyshty ekenin jasyrmaıdy. «Jas kezinde kóp aýyratyn. Qalaı sportpen aınalysa bastady, solaı aýr-syrqaý degendi múlde umyttyq. Tártibi de túzelip, ýaqytty tıimdi jáne durys paıdalanýdy úırendi», deıdi anasy mereılenip.
Alan – tekti tuqymnan tamyr tartqan óren. Atasy Hákim Qurmanǵalıev Uly Otan soǵysynda batyrlyǵymen kózge túsken jaýynger bolypty. Tipti maıdan dalasynda kórsetken kózsiz erligi úshin Keńes Odaǵynyń Batyry ataǵyna usynylǵan kórinedi. Al Alannyń óz ákesi Denıs Qurmanǵalıev qurylysshy bolyp jumys isteıdi. Onyń aıtýynsha, balasynyń boıyndaǵy eńbekqorlyq pen tabandylyq qanda bar qasıet eken. «Men Alannyń bizdi uıatqa qaldyrmaı, óziniń kózdegen maqsatyna jetetinine senimdimin», deıdi Denıs.
Alan syndy týma talanttyń armany da asqaq: endi ol Azııa, álem chempıonattarynda jeńiske jetip, odan keıin Olımptiń shyńyn baǵyndyrýdy aldyna maqsat etip qoıǵan.
QARAǴANDY