Qazaqstan Respýblıkasynyń Tuńǵysh Prezıdenti – Elbasy kitaphanasynyń qory «Aq jol» 25 tomdyq jınaǵymen tolyqty.
Jaqynda «Alash» ádebı syılyǵynyń laýreaty, QR eńbek sińirgen qaıratkeri Hanbıbi Esenqaraqyzynyń bastamasymen qurastyrylǵan kóptomdyq mura jan-jaqty zerdelenip, qalyń kórermenge jol tartty.
Zamanynda talaı qýǵyn-súrgin kórgen zııaly qaýym ókilderiniń eńbekteri halyqqa tegis jetpedi. Táýelsizdikke qol jetkizgennen keıin bul jaǵdaı ózgerip sala berdi. Atasy Alash, keregesi aǵash qazaqtyń zar zamanda joǵaltqan qundylyqtary qaıtarylyp, bary bútindelip, azattyqpen birge sáýleli sátterge toly shýaqty shejiresi túzile bastaǵandaı. Memleket basshysy Qasym-Jomart Kemeluly Toqaev Elbasynyń irgeli bastamalary halyq sanasyn jańǵyrtýǵa úlken úles qosatyndyǵyn atap ótip, saıası qýǵyn-súrgin qurbandaryn eske alyp, elimizdiń bas gazetinde kólemdi maqala jarııalaǵan edi.
«Kórkem jáne derekti tarıhı týyndylarda memlekettilik jáne memleketshildik ıdeıasy árdaıym kórinis tabýy qajet. Biz kezinde elge qyzmet etýdiń ozyq úlgisin kórsetken Alash qaıratkerlerinen taǵylym alamyz. Olar ótken ǵasyrdyń basynda táýelsizdik ıdeıalaryn halyq arasynda dáripteýge zor eńbek sińirip, azattyq jolynda qurban boldy. Táýelsizdigimizdiń mereıtoıy aıasynda osyndaı birtýar tulǵalardy eske alyp, olardyń murasyn jastarymyzǵa jáne búkil álemge pash etýimiz kerek. Sonymen birge, osy taqyrypty zerttep júrgen ǵalymdar men jazýshylardyń da eńbegi qoldaýǵa ıe bolýy jáne baǵalanýy qajet. Alash arystarynyń asyl murasyn ıgerý jalǵasa berýge tıis», – dep edi Prezıdent óz maqalasynda.
О́tken ǵasyrdyń bas kezinde jaryq kórgen «Aq jol» gazetiniń maqalalarynan jınaqtalǵan bul kitaptyń tarıhı-tanymdyq turǵydan alǵanda sanaly oqyrman qaýymǵa bereri mol. Ásirese, arada ǵasyrǵa jýyq ýaqyt ótse de búginniń kún tártibinde turǵan ózekjardy máseleler týrasyndaǵy Alash zııalylarynyń ótkir oılary kez kelgen adamdy tolǵandyrmaı qoımaıdy.
Ár paraqty ashqan saıyn túrli búrkenshik atpen jazylǵan Alash zııalylarynyń, ulttyń rýhanı kósemderiniń qoltańbasymen qaýyshýǵa bolady. «Qarańǵy qazaq kógine órmelep shyǵyp kún bolam» deıtin jaýynger sezim ıeleriniń jan aıqaıymen, búginde óz qunyn joımaǵan, qadyrin joǵaltpaǵan oılarmen bólisip, ótken ǵasyrdyń basyndaǵy Alash tarıhynyń keıbir aqtańdaq tustarymen tanysýǵa jol ashyldy.
«Aq jol» gazeti 1920 jyldyń 7-shi jeltoqsanynan bastap, 1926 jyl kóleminde Túrkistan respýblıkasynyń kindik basqarma komıteti hám ortaqshyl partııa kindik komıtetiniń atynan Tashkentte jeti saıyn úsh márte úzbeı shyǵyp turdy. Alaıda, keńestik ıdeologııanyń tar sheńberine sımaǵan Alash ardaqtylarynyń kósemsózi keıingi urpaq sanasynan ádeıi óshirildi. Tóte arab jazýynan latynǵa, ile-shala kırıllısaǵa kóshirildi. Halqymyz ótken tarıhynan eriksiz kóp jazyp qaldy.
Esterińizge sala keteıik, 1920-1925 jyldar aralyǵynda jaryq kórgen «Aq joldyń» tuńǵysh redaktory – Sultanbek Qojanov. Sondaı-aq, gazettiń shyǵýyna T.Rysqulov, N.Tórequlov, M.Dýlatov, J.Aımaýytov, H.Dosmuhamedov, I.Jansúgirov, A.Baıtursynuly, S. Ospanov syndy qazaq zııalylarynyń úlken shoǵyry atsalysty.
Júz jyldyqtyń alǵashqy jartysyndaǵy Alash zııalylarynyń amanat sózi el táýelsizdiginiń 30 jyldyǵyna tamasha tartý boldy. Qazaqstannyń qoǵamdyq-saıası oıynyń jáne mádenı-aǵartý isiniń damýyna yqpal etken gazettiń baǵaly jınaǵy óz tarıhymyzdy jete bilýge jol ashady.