Osydan bir aı buryn Qazaqstan Jazýshylar odaǵy Nur-Sultan qalalyq fılıaly men Nur-Sultan qalasy ákimdigi «Kóńilde alań basylsa…» atty aqyndar músháırasyn jarııalaǵan bolatyn. Kúni keshe jyr dodasynyń jeńimpazdary anyqtalyp, marapattaý rásimi ótti.
Jas qalamgerlerdiń shyǵarmalaryn baǵalap, saraptaǵan qazylar alqasynyń quramynda aqyndar Ońaıgúl Turjan, Janat Áskerbekqyzy, fılıal dırektory Dáýletkereı Kápuly boldy. Elýge tarta aqyn synǵa túsken jyr saıysynda bas júldeni Birjan Ahmer enshiledi. Birinshi orynǵa Aızada Rahymjanova ıe bolsa, ekinshi oryn Erlan Amanqojaǵa buıyrdy. Al úshinshi dárejeli dıplomǵa Aıdana Segizbaeva, Álı Bekmuhanbet, yntalandyrý syılyǵyna Alpamys Faızolla, Aýǵanbaı Sanaquly, Erasyl Sádýaqas laıyq dep tabyldy. Jarqyraı kóringen júldeli óleńderdi elordalyq teatr akterleri oqyp, kórermen nazaryna usynady. Sondaı-aq basqosý barysynda qaladaǵy aqyn-jazýshylarǵa Ázerbaıjan elshisi R.Mammadovtyń alǵys haty, respýblıkalyq «Samuryq» ádebı-mádenı jýrnaly tabystaldy.
Sonymen qatar ádebı basqosý aıasynda elordalyq bólimshe dırektory Dáýletkereı Kápuly jastar shyǵarmashylyǵy jónindegi orynbasaryn tanystyrdy. Bul orynǵa «Daryn» Memlekettik jastar syılyǵynyń ıegeri, aqyn Oljas Qasym taǵaıyndaldy.
Búginde bas qalada jas aqyn-jazýshylar qatary kóbeıip, ádebı orta qalyptasyp keledi. Jańa býyn da ortaq oı almasyp, shyǵarmashylyq baılanys ornatatyn birden-bir jer – fılıaldyń «Jazýshylar úıi». Sol sebepti jastarmen jumys jandanyp, irgeli bastamalar jalǵasyn tabýǵa tıis.
Fılıaldyń muryndyq bolýymen osyǵan deıin Eýrazııa astanalary qalamgerleri forýmynan bastap, túrli mádenı is-sharalar ótkizilip keledi. Bólimsheniń uıytqy bolýymen jastarǵa serpin beretin baıqaýlar da jıi uıymdastyrylatyny málim.