Erteń, 22 jeltoqsan kúni Belarýstiń astanasy Mınsk qalasynda qazaq kúresinen osymen tórtinshi ret ótetin álem chempıonaty bastalady. Bul týraly www.egemen.kz tilshisi habarlady.
Álem chempıonaty 22 jeltoqsan kúnine deıin jalǵasady. Oǵan 30-dan astam elderdiń quramalary qatysady. Qazir Belarýske 29 eldiń ókilderi taban tirep úlgerdi. Al jarystyń ózi Mınskden 18 shaqyrym jerde ornalasqan «Staıkı» sporttyq bazasynda ótedi. Bul sport kesheniniń KSRO kezinde odaqtyq deńgeıdegi sport ordasynyń bolǵanyn bilemiz. Oǵan keńes Odaǵynyń ár túkpirinen sportshylar men jattyqtyrýshylar jınalyp, Olımpıada, álem chempıonattary sııaqty úlken dodalarǵa daıyndalatyn. Qazirgi kezde de ol TMD kóleminde mańyzyn joıǵan joq. Oǵan dálel retinde tól kúresimizden álem chempıonatynyń «Staıkı «sporttyq bazasynda ótetinin aıtýǵa bolady. Al fınaldyq beldesýler Mınskde ótedi. Onda fınalǵa joldama alǵandar erkin kúresten úsh dúrkin Olımpada chempıony Aleksandr Medvedtiń kúres saraıynda beldesedi. Alań ıelerin aıtpaǵanda, bizdiń eldiń ulttyq quramasy Mınskige bárinen buryn keldi. Bizdiń sport delegasııasymyz 19 jeltoqsan kúni jergilikti ýaqyt boıynsha tańǵy saǵat 08.00-de kelip, «Staıkı» sporttyq bazasyna ornalasty. Astana men Mınskiniń saǵat aıyrmashylyǵy 3 saǵat eken. Iаǵnı, Astananyń ýaqyty Belarýs astanasynan 3 saǵat alda. Sol sebepti balýandar kelgen kúnnen beri jergilikti ýaqytqa, aýa-raıyna boıaryn úıretip, jattyǵýlaryn jasap jatyr. Jalpy, bizdiń elden álem chempıonatyna 8 balýan keldi. Sonyń beseýi óz salmaqtarynda kúresse, qalǵan úsheýi qosalqy quramda qalyp otyr. Balýandardyń jarysqa daıyndyǵy jaqsy dep aıtýǵa bolady. Qosalqy quramdaǵy balýandardyń ózi tańerteńnen erte turyp, sporttyq bazany aınala júgirip, jarysqa qatysyp qalamyz ba degen úmitpen daıyndalyp jatyr. Sonyń ishinde ózimizben qonaq úıdiń bir nomerinde jatqan 60 kılo salmaqtaǵy Amangeldi Satybaldınov kún saıyn salmaǵyn qýyp, daıyndalýda. Jarysqa ulttyq qurama Jeńis Bıtkózovtiń basshylyǵymen jattyǵýda. Endi kilemge shyǵatyn balýnadarǵa kelsek,eń jeńil salmaqta Abzal Arystanbekov beldesedi. Onyń rezervısi jańa biz aıtqan Amangeldi Satybaldınov. Kelesi 70 kılo salmaqta Erlan Estek qatysady. Bul ekeýi jaqynda Tarazda ótken «Eýrazııa barysy» týrnıriniń jeńimpazy atanǵan balýandar. 80 kılo salmaqta Ersin Muhamedjanov kilemge shyǵady. Odan keıin 90 kılo salmaqta Muhıt Tursynov beldesse, eń aýyr salmaqta bıylǵy «Qazaqstan barysy» Aıbek Nuǵymarov kúsh synasady. Bul dodaǵa belgili bir sebeptermen «eýrazııa barysy» Beıbit ystybaev qatyspaıdy. Ol jarysty jankúıer retinde ǵana tamashalaıdy.
Búgin, 21 jeltoqsan kúni «Staıkı «sporttyq bazasynda mandattyq komıssııanyń otyrysy men balýandardyń salmaq ólsheý rásimi ótti. Al erteń irikteý beldesýleri ótedi. Onda qazaq kúresinen basqa da jarystar ótedi dep josparlanyp otyr. Mysaly, Dúnıejúzilik qazaq kúresi federasııasynyń prezıdenti Serik Tókıevtiń aıtýynsha, álemdik doda kezinde qazaq kúresinen Belarýs chempıonaty, qyrǵyzdardyń alysh kúresinen jarystar ótse, ýkraınder de ózderiniń ulttyq kúresin kórsetýdi josparlap qoıypty. Osydan keıin chempıonat kezinde Dúnıejúzilik qazaq kúresi federasııasynyń otyrys ótip, onda federasııanyń prezıdentin saılaý, kelesi álem chempıonaty ótetin eldi anyqtaý men basqa da mańyzdy máseleler qaralady.
Dastan Kenjalın.
Derekkóz: egemen.kz.