Altynbek Sársenbaıulyn atqyzǵan – Rahat Álıev

Bul AQSh Federaldyq Tergeý bıýrosy tergeý-tekserýiniń nátıjesinde dáleldendi

Bas prokýratýra el qulaǵyn eleń etkizgen osyndaı málimdeme jasady keshe. AQSh-tyń Qazaqstan Respýblıkasyndaǵy ýaqytsha senimdi ókili Djon Ordveı men Qazaqstan Respýblıkasy Bas prokýrorynyń orynbasary Andreı Kravchenko resmı habarlama jasaǵan brıfıngte osy ýaqytqa deıin qupııa bolyp kelgen qylmystyń jańa qyr-syry aıtyldy.

Bul AQSh Federaldyq Tergeý bıýrosy tergeý-tekserýiniń nátıjesinde dáleldendi

Bas prokýratýra el qulaǵyn eleń etkizgen osyndaı málimdeme jasady keshe. AQSh-tyń Qazaqstan Respýblıkasyndaǵy ýaqytsha senimdi ókili Djon Ordveı men Qazaqstan Respýblıkasy Bas prokýrorynyń orynbasary Andreı Kravchenko resmı habarlama jasaǵan brıfıngte osy ýaqytqa deıin qupııa bolyp kelgen qylmystyń jańa qyr-syry aıtyldy.

AQSh-tyń Qazaqstan Respýblıkasyn­da­ǵy ýaqytsha senimdi ókili Djon Ordveı bul isti tergeý kezinde eki el quqyq qorǵaý organdarynyń tyǵyz qarym-qatynasta jumys isteýine mol múmkindik týǵanyn tilge tıek etti. «Qylmystyń mán-jaılaryn saraptap, qaıta súzgiden ótkizý kezinde AQSh Federaldyq Tergeý bıýrosynyń ma­mandary tolyq ári mańyzdy derek-dáıek­termen qamtamasyz etildi. Negizinen AQSh-tyń Federaldyq Tergeý bıýrosy júrgizgen tergeý-tekserý is-sharalarynyń nátıjeleri Qazaqstan Respýblıkasy Bas Prokýratýrasynyń tujyrymdarymen sáı­kes keledi. Men Altynbek Sársenbaıuly­men kezdeskenmin, ony tanıtyn edim. Sol sebepti, uzaqqa sozylǵan osy istiń aıaq­tal­ǵanyna qýanyshtymyn. Eki jaqtap júr­gi­zilgen tergeý bul qylmysqa sońǵy ári ádil núktesin qoıady dep senemin», dedi Dj.Ordveı.

Resmı málimdeme jasamas buryn Bas prokýrordyń orynbasary Andreı Kravchenko bul qandy oqıǵanyń táýelsiz Qazaqstan tarıhynda atyshýly qylmystyq is retinde qalǵanyn da aıtyp ótti.

Qatygezdigimen ǵana emes, qoǵam­dyq jańǵyryq týdyrǵan daýly, eki­udaı­ly­ǵymen de jurttyń qyzý talqysyna tús­ken qylmystyq oqıǵaǵa qatysty jańa málimetterdiń belgili bolǵanyn ha­barlaǵan A.Kravchenko: «Bul iske qa­tysty tergeý, anyqtaý is-sharalary uzaqqa sozylǵany belgili. Búgin biz amerıkalyq áriptesterimizdiń kómegimen keń kólemde keshendi júrgizilgen jumystyń qorytyndysy jaıly, sondaı-aq, tergeý barysynda anyqtalǵan tyń málimetterdi jarııalamaqpyz», dedi. Sóz barysynda bul istiń túptiń-túbinde aqıqat shyndyǵy aıqyndalyp, ádil sheshimin tabatynyna senim bildirgen ol adam óltirýge tapsyrys bergender men qylmysty oryndaýshylardyń naqty bet-beınesi belgili bolyp, tıisti jazasyn alatyndaryna da kúmán keltirmedi.

Esterińizde bolsa, «Naǵyz Aq jol» par­tııasynyń basshysy Altynbek Sár­senbaıuly jáne onyń qos kómekshisi Baýyrjan Baıbosyn men Vasılıı Jý­ravlevtiń ólimi 2006 jyldyń 11 aqpa­nynda tirkelgen bolatyn. Jelke tustarynan atylǵan oqtan kóz jumǵan úsh azamattyń deneleri eki kún ótkennen keıin, ıaǵnı, 13 aqpanda Almaty oblysynyń Talǵar aýdanyndaǵy jol jıeginen tabylǵan edi. Túrli boljam aıtylyp, san tujyrym jasalǵan bul qanquıly oqıǵa eshkimdi de beıjaı qaldyrmaǵany anyq. Áli kúnge deıin kóptiń kókeıinde «Altynbekti atqyzǵan kim?» degen suraqtyń kómeski sáýlesi de sónbeı kelgen edi.

Memleket jáne qoǵam qaıratkeri Al­tynbek Sársenbaıuly men onyń kómek­shileriniń ólimine qatysty sot prosesi ashyq túrde ótip, osy qylmysqa qatysy bar dep tanylǵan Rýstam Ibragımov pen onyń 9 sybaılasyna úkim de shyqqan bolatyn. Tergeý barysynda Rýstam Ibragımov saıasatkerdi óltirýge tapsyrys bergen sol kezde Qazaqstan Respýblıkasy Parlamenti Senatynyń apparat jetekshisi qyzmetin atqarǵan Erjan О́tembaev dep atap kórsetken edi. Keıinnen О́tembaevtyń ózine de «tapsyrys berýshi» degen úkim oqylady. Osylaısha 2006 jyly tamyzdyń 31-i kúni Almaty oblystyq sotynyń sheshi­mimen qandy qylmysty tikeleı uıym­dastyrýshy jáne oryndaýshy retinde Ibragımov ómir boıy, al qalǵandary uzaq merzimge bas bostandyqtarynan aıyrylady. Alaıda, qalyń kópshilik kókeıinde sot úkiminiń ádildigine ǵana emes, iske qatysty kúdiktilerdiń tolyq esimderi atalmaǵanyna kúmán taby qalǵany jasyryn emes-tin.

Jarııalylyǵynan jumbaǵy kóp bul oqıǵanyń budan arǵy jelisin Qazaqstan Respýblıkasy Bas prokýratýrasynyń resmı habarlamasymen jalǵastyrýdy jón kórdik. Sonymen...

2012 jyldyń 16 sáýirinde túzeý meke­me­sinde jazasyn ótep júrgen Rýstam Ibragımov Qazaqstan Respýblıkasynyń Joǵarǵy Sotyna aryz joldaǵan. Onda ol saıasatker men onyń kómekshilerine qatysty jurtty shýlatqan qylmystyń buǵan deıin quqyq qorǵaý jáne sot organdaryna beımálim bolyp kelgen mán-jaılary týraly habarlaǵan.

О́mirinde birinshi ret adam óltirip, qolyn qanǵa malǵanyn tolyq moıyndaǵan Ibragımov aryzynda úsh birdeı atpal azamattyń ajaly qalaı bolǵanyn egjeı-tegjeıli baıandap, qylmystyń osy ýaqytqa deıin qupııa kúıde kelgen tustaryn qolmen qoıǵandaı beınelep bergen. Sóz sońynda ol Altynbek Sársenbaıulyn óltirýge tapsyrys bergen Erjan О́tembaev emes, shyn máninde Rahat Álıev pen Álnur Musaev ekenin de jaıyp salǵan.

Rýstam Ibragımovtiń bul aıtqandary shyndyqqa qanshalyqty sáıkes keledi? Osy suraqtyń mán-jaıyn ashyp, jańadan alynǵan jaýaptyń aq-qarasyn ajyratý úshin Qazaqstan Respýblıkasy Joǵarǵy Sotynyń tapsyrmasymen Bas prokýratýra, Ulttyq qaýipsizdik komıteti jáne Ishki ister mınıstrliginiń qyzmetkerlerinen arnaıy jedel-tergeý toby jasaqtalyp, qaıta tekserý jumystary qolǵa alynady. Qazaqstan Respýblıkasy Bas prokýratýrasynyń ótinishi boıynsha tergeý isine AQSh-tyń Federaldyq Tergeý bıýrosy da tikeleı qatystyrylady.

«Tergeý barysynda jańadan ashylǵan mán-jaılardyń aqıqaty anyqtalyp, óz dálelin tapty, – dedi resmı habarlama jasaǵan Bas prokýrordyń orynba­sary Andreı Kravchenko. – Rýstam Ibragımov polıgrafologııalyq zertteý jáne AQSh-tyń Federaldyq tergeý bıýrosynyń agentterine bergen suhbatynda bul qylmysty jasaýǵa Rahat Álıevtiń tapsyrys bergenin aıtqan».

Bir aıta keterligi, Ibragımov bul jóninde 2006 jyly, ıaǵnı, qylmys bolǵannan keıin júrgizilgen tergeý is-sharalary kezinde-aq málimdegen. Alaıda, otbasynyń qaýipsizdiginen qam jegen ol bul jóninde quqyq qorǵaý organdaryna resmı túrde jaýap berýden úzildi-kesildi bas tartyp, ózi aıtqan aqparatty esh jerde jarııalamaýdy suraǵan. Sebebi, Rýstam Ibragımov bul shyndyǵy úshin Rahat Álıev pen Álnur Musaev jaqyndaryna qastandyq jasaýy múmkin dep qoryqqan.

Rýstam Ibragımovtiń aryzyn tergeý barysynda AQSh-tyń Federaldyq Tergeý bıýrosy bul aqparattyń aqıqatyn tıisti qujattarmen rastap otyr.

Oqıǵalardyń budan keıin qalaı órbigeni Bas prokýratýranyń resmı habarlamasynda naqty aıtylǵan.

Baný RAHYMBAIQYZY,

jýrnalıst.