Endi bul áreketten qazaqstandyq áskerıler de syrt qalmaıdy
Keshe Parlament palatalarynyń birlesken otyrysy bolyp, kún tártibinde Qazaqstan Respýblıkasynyń Prezıdenti N.Á.Nazarbaevtyń Qazaqstan Respýblıkasy Qarýly Kúshteriniń ofıserlerin BUU-nyń mıssııalaryna qatysý úshin baqylaýshylar retinde jiberý týraly usynysy qaraldy.
Endi bul áreketten qazaqstandyq áskerıler de syrt qalmaıdy
Keshe Parlament palatalarynyń birlesken otyrysy bolyp, kún tártibinde Qazaqstan Respýblıkasynyń Prezıdenti N.Á.Nazarbaevtyń Qazaqstan Respýblıkasy Qarýly Kúshteriniń ofıserlerin BUU-nyń mıssııalaryna qatysý úshin baqylaýshylar retinde jiberý týraly usynysy qaraldy.
Otyrysqa qos palata depýtattarynan ózge Konstıtýsııalyq Keńestiń jáne Ortalyq saılaý komıssııasynyń tóraǵalary, Úkimet músheleri, Prezıdentke tikeleı baǵynatyn jáne esep beretin memlekettik organdardyń basshylary, Prezıdent Ákimshiliginiń, Premer-Mınıstr Keńsesiniń, Parlament apparattarynyń jaýapty qyzmetkerleri jáne buqaralyq aqparat quraldarynyń ókilderi qatysty.
Konstıtýsııaǵa sáıkes Parlament palatalarynyń birlesken otyrysynda Elbasy – Qarýly Kúshterdiń Joǵarǵy Bas qolbasshysynyń usynysy boıynsha beıbitshilik pen qaýipsizdikti saqtaý jónindegi halyqaralyq mindettemelerdi oryndaý úshin elimizdiń Qarýly Kúshterin paıdalaný týraly sheshim qabyldanady.
Osyǵan oraı Memleket basshysynyń joǵaryda atalǵan usynysyn depýtattarǵa Qorǵanys mınıstri Ádilbek Jaqsybekov jetkizdi. Prezıdenttiń usynysynda sońǵy jyldary álemdik qoǵamdastyqtyń dúnıejúziniń túrli óńirlerindegi qarýly janjaldardy beıbit retteýge járdemdesýge baǵyttalǵan bitimgershilik operasııalary deńgeıindegi kúsh-jigeri eleýli arta túskendigi aıtylǵan.
Statıstıkada 1992 jyldan beri álemde memleketaralyq janjaldar sany 40 paıyzǵa qysqarǵan, dep kórsetilipti Elbasynyń usynys hatynda. Bul kóp jaǵdaıda BUU bitimgershilik operasııalaryn júrgizýmen baılanysty. Beıbitshilikti saqtaý halyqaralyq ujymdyq mindet bolyp tabylǵandyqtan, BUU Jarǵysyna sáıkes, uıymǵa múshe memleketterdiń barlyǵy halyqaralyq beıbitshilik pen qaýipsizdikti qoldaý úshin áskerı kontıngentter bólýge kelisken. Bul rette, óziniń áskerı kontıngentterin bóletin elder áskerılerdi daıarlaý prosesine belsendi túrde engiziletin qazirgi jaǵdaıdaǵy is-qımyldar júrgizýdiń praktıkalyq tájirıbesin jınaqtaıdy.
Budan basqa, usynys mátininde BUU beıbitshilik pen qaýipsizdikti nyǵaıtý jónindegi halyqaralyq mindetterdi oryndaýǵa is júzinde qosqan úlesi álemdik qoǵamdastyq tarapynan joǵary baǵalanyp, eldiń syrtqy saıasatyndaǵy múddelerin ilgeriletýde, sondaı-aq, áskerı-tehnıkalyq salada jáne kadrlar daıarlaýda salmaqty sebep retinde qyzmet etetini atap ótilgen. BUU bitimgershilik mıssııalaryna qazaqstandyq áskerı qyzmetshilerimizdi jiberý BUU-nyń beıbitshilik pen qaýipsizdikti saqtaý jónindegi BUU Bas organy – Qaýipsizdik Keńesine jáne BUU Bas Assambleıasy 71-sessııasyna tóraǵalyǵyna saılanýda Qazaqstannyń kandıdatýrasyn ilgeriletýge yqpal etetin bolady. Sóz reti kelgende mınıstr: «Bul Qazaqstan Qarýly Kúshteri damýyndaǵy mańyzdy qadam – bizdiń ofıserlerimiz bitimgershilik operasııalaryna qatysý boıynsha qundy tájirıbe jınaqtap, halyqaralyq ortada jumys isteýge mashyqtanady», degendi aıtty.
Sondaı-aq, osy baǵyttaǵy qyzmettiń mańyzdylyǵy memlekettiń álemdik qoǵamdastyqtaǵy bedelin nyǵaıtýdyń ózekti bolýymen aıqyndalady. Birikken Ulttar Uıymynyń bitimgershilik qyzmetiniń róli aıtarlyqtaı: BUU málimetteri boıynsha, sońǵy 20 jyl ishinde álemdegi memleketaralyq qaqtyǵystar sany is júzinde jartylaı kemigen, bul aıtarlyqtaı dárejede bitimgershilik operasııalarynyń júrgizilýine baılanysty. TMD elderin qosa alǵanda, kóptegen memleketter bitimgershilik qyzmetine belsendi túrde qatysýda. Elimizdiń de beıbitshilik pen qaýipsizdikti qoldaý jónindegi operasııalarǵa qatysý tájirıbesi bar. Ol – Iraktaǵy mıssııa. BUU bitimgershilik operasııasy bolmasa da ol Qaýipsizdik Keńesiniń sanksııasymen júzege asyrylǵany belgili.
Usynysqa sáıkes, baqylaýshylar retinde 5 áskerı qyzmetshiden Gaıtı, Batys Sahara, Kot,d Ivýar jáne Lıberııadaǵy BUU mıssııalaryna jiberý kózdelgen. Bul mıssııalar syrtqy saıası maqsattarǵa súıenip, sondaı-aq, qaýipsizdik salasyndaǵy ahýaldy eskere otyryp tańdalǵan. Mınıstrdiń sendirýinshe, baqylaýshylar qaqtyǵystarǵa qatyspaıdy, beıtaraptyq ustanymyn saqtap, eshbir tarapty jaqtamaıdy. Olar mıssııaǵa qarýsyz jiberiledi, óıtkeni, olardyń negizgi mindeti ahýaldy taldap, BUU-ǵa baıandaý bolyp tabylady.
Otyrysta mınıstrge suraqtar qoıylar aldynda májilis depýtattary J.Jarasov pen N.Ábdirov jáne senatorlar A.Savchenko men B.Shelpekov Prezıdent usynysyn qoldaıtyndyqtaryn aıtyp, áriptesterin de osyǵan shaqyrdy. Jalpy, mınıstrdiń jaýabynan belgili bolǵandaı, Qazaqstan bolashaqta bitimgershilik mıssııasyn atqarýǵa bir rotadan turatyn áskerı kontıngent jiberýi múmkin. Alaıda, bul másele jan-jaqty kelisiletin bolady. Qazirgi tańda bitimgershilik mıssııasyna 120 memleket tartylsa, óz áskerı kontıngentterin jibergender qatarynda Lıtva, Latvııa, Mońǵolııa, Malaızııa sııaqty shaǵyn elderdiń de barlyǵy atap ótildi.
Osylaısha depýtattar Parlament palatalarynyń birlesken otyrysynda Elbasy Nursultan Nazarbaevtyń Qazaqstan Respýblıkasy Qarýly Kúshteriniń ofıserlerin BUU-nyń mıssııalaryna qatysý úshin baqylaýshylar retinde jiberý týraly usynysyn biraýyzdan qoldady.
Asqar TURAPBAIULY,
«Egemen Qazaqstan».