Búgin Nur-Sultan qalasynda iri kólemde para alý kezinde Joǵarǵy sot sýdıasy ustaldy, dep habarlaıdy Egemen.kz Joǵarǵy sottyń resmı saıtyna silteme jasap.
Sybaılas jemqorlyqqa qarsy is-qımyl agenttigi men Joǵarǵy sotynyń ishki qaýipsizdik qyzmeti belgili bir ýaqyt ishinde birlesken is-sharalar júrgizdi. Nátıjesinde 11 aqpanda Nur-Sultan qalasynda iri kólemdegi aqshany alý kezinde Joǵarǵy sottyń sýdıasy ustalǵan.
«Qarajat onyń Joǵary sot keńesinde jumys istegen kezinde Túrkistan oblysy aýdandyq sotynyń sýdıasyn basqa sotqa aýystyrýǵa járdem kórsetkeni úshin berilgen. Sondaı-aq Túrkistan qalasynda aqshany berip jibergen aýdandyq sottyń sýdıasy ustaldy. Tergeý amaldarynyń júrgizilýine baılanysty basqa aqparat jarııalanbaıdy», delingen habarlamada.