Taldyqorǵan qalasynda ótken jyly barlyq qarjy kózderinen 137,5 myń sharshy metr turǵyn úı iske qosylǵan, bul 2019 jylmen salystyrǵanda 9,1% ósken. Al bıyl jalpy kólemi 164 myń sharshy metr turǵyn úı salynady, sonyń 91,6 myń sharshy metri bıýdjet esebinen, 73,9 myń sharshy metri qurylys kompanııalarynyń jeke ınvestısııasy men jeke tulǵalardyń qarjysyna salynady. Sol sııaqty bıyl apatty úılerdiń máselesi de sheshiledi. Bul týraly búgin oblys ákimi Amandyq Batalovtyń qatysýymen onlaın rejımde ótken Taldyqorǵan qalasynyń ákimi Ǵ.R.Ábdiraıymovtyń turǵyndar aldyndaǵy qorytyndy esep berý jıynynda aıtyldy, dep habarlaıdy Egemen.kz Almaty oblysy ákiminiń baspasóz qyzmetine silteme jasap.
Jalpy búgingi kúni Taldyqorǵanda 178,5 myń adam turady. Qala ákimi Ǵ.Ábdiraıymovtyń aıtýynsha, ótken jylda ónerkásip óndirisiniń kólemi 88,3 mlrd teńge, qurylys montaj jumystarynyń kólemi 40,9 mlrd teńgege jetken. Qala ekonomıkasyna 78,9 mlrd teńge ınvestısııa tartylǵan. Bıylǵy jyly ónerkásipte quny 6,0 mlrd teńge bolatyn jańa jobalar iske qosylmaq. Bul rette pektın jáne qurǵaq jem shyǵaratyn "GreenTechnology Partners" JShS zaýyty, qurama jem óndiretin "Astana halyq EKSPO" JShS zaýyty, keramogranıt óndirýmen aınalysatyn «Almaz Keramıks» JShS zaýytynyń birinshi jelisiniń qurylys jumystary júrgiziledi. Olarda 300-deı jańa jumys orny ashylady dep kútilýde. Sol sııaqty "Qaınar AKB" JShS óndiris irgesin keńeıtip, 1,8 mlrd teńgege jańa jeli ashady, onda 35 adam jumyspen qamtylmaq. Sóıtip ónerkásip óndirisiniń kólemin 94,0 mlrd teńgege jetkizý kózdelgen.
Búgingi kúni qalada 16,8 myń adam turǵyn úı kezeginde tur. Taldyqorǵandyqtardy baspanamen qamtý maqsatynda ótken jyly barlyq qarjy kózderinen 137,5 myń sharshy metr turǵyn úı berilse, bıylǵy jyly jalpy kólemi 164 myń sharshy m turǵyn úı salynady, sonyń 91,6 myń sharshy metri bıýdjet esebinen, 73,9 myń sharshy metri qurylys kompanııalarynyń jeke ınvestısııasy men jeke tulǵalardyń qarjysyna salynady. «Sonda biz jyl sońyna deıin 2,0 myń otbasyn, sonyń ishindegi kezekte turǵan 1142 azamatty turǵyn úımen qamtýǵa múmkindik alamyz», dedi Ǵ. Ábdiraıymov.
Onyń aıtýynsha, Taldyqorǵandaǵy 6, 7 jáne 8 shaǵyn aýdandarda 33 kóp qabatty úıdiń qurylysy bastaýǵa daıyn, sol sııaqty kottedj qalashyǵynda 232 úı jyl sońyna deıin aıaqtalady. Kottejdi qalashyqta sport alańynyń qurylysy aıaqtalýǵa taıaý, onda fýtbol, voleıbol, basketbol alańdary bar. Bul qalashyqta mektep, balabaqsha sııaqty áleýmettik nysandarmen qatar turmystyq qyzmet kórsetý, saýda ortalyqtary da qarastyrylady.
Sol sııaqty bıyl apatty úılerdiń de máselesi sheshiledi. Oǵan oblystyq bıýdjetten 855 mln teńge qarastyryldy.
Qala saıajaılaryna da kóńil bólinip, "Úıtas" jáne "Merekelik" saıajaı qoǵamdarynyń 6,7 myń otbasy aýyzsý jáne elektrmen qamtamasyz etilýde. Bul jumys bıylǵy jyly jalǵastyrylyp, Qaratal, Almaly, Klıýchı saıajaılarynda jalpy 28,9 km aýyzsý jelilerin salý josparlanǵan. 10 saıajaı qoǵamynyń 30 km basty joldaryna kóshe jaryǵyn ornatýdyń jobalyq qujattamasy ázirlenip jatyr.
Qalada búgingi kúni tabıǵı gazǵa 24 595 abonent qosyldy. Qazir Yntymaq, Jastar-2, 3-shi bólimshe eldi mekenderinde gaz taratý jelisiniń qurylysyna qajetti JSQ daıyn boldy, qarjy bólingen bette qurylys jumystary bastalady. Bul osy eldi mekenderdegi 2241 otbasynyń gazǵa qosylýyna múmkindik beredi.
Qala ákimi jol jóndeý, jolaýshy tasymaly, aýlalardy abattandyrý, «Jumyspen qamtý jol kartasynyń» iske asyrylýy, jumyssyzdyqpen kúres, áleýmettik salalardy qoldaý baǵyttary týraly da keńinen aıtyp berdi.
Baıandamadan keıin suraq qoıýǵa kezek berildi. Suraq qoıǵan qala turǵyndary tarapynan aýlalardy abattandyrý, saıajaıǵa baratyn avtobýstardy saıajaı ishimen júrgizý, Yntymaq aýylynda káriz júıesiniń qashan iske qosylatyny, № 6 mekteptiń bastaýysh synyby balabaqsha ǵımaratynda oqyp jatqandyqtan, jańa ǵımarat qajettigi, indetpen kúreste kóz jumyǵan medısına mamandaryna arnap eskertkish qoıý, jer ýchaskesi kezekpen qashan berile bastaıtyny, kásibin bastaýǵa kómek qajetti sııaqty kóptegen máseleler kóterildi. Qala ákimi suraqtarǵa tolyqqandy jaýap berdi. Máselen, № 6 mekteptiń bastaýysh synybyna arnap ǵımarat salý úshin sol mańdaǵy 60-qa jýyq úıdi satyp alý qajet. Sosyn ony súrý, rekýltıvasııa jasaý jumystary júrgizilýdi tıis. Bul másele josparda bar, qarjysy qarastyrylǵan. «Al medısına mamandaryna eskertkish qoıý máselesin keńesip sheshemiz», - dedi Ǵ. Ábdiraıymov. Yntymaq aýylyna káriz júıesi bıyl tartylady, JSQ-sy bar. Bıylǵy jyldyń naýryz aıynan bastap ınjenerlik ınfraqurylymy tartylǵan daıyn jer ýchaskeleri Qaratal aýdanyna shyǵa beris mańaıdan kezekte turǵan azamattarǵa berile bastaıdy.
Jıyn sońynda sóz alǵan Amandyq Batalov qalada kóp jumystar atqarylyp jatqanyn aıtty. Degenmen qarqyn qosýdy, nazar aýdarýdy qajet etetin tustar da az emes.
- О́tken jylda bizde óndiriste, aýyl sharýashylyǵynda, jalpy barlyq salada ósim bar. Indettiń saldarynan tek kólik tasymaly men saýda salasynda ǵana azdaǵan irkilister boldy. Stýdentter úshin úsh jańa jataqhana salyp berdik. Jýyrda basseın ashylady. Basqa da atqarylǵan jumystar kóp, men ony óz esebimde tolyq aıtyp beremin. Qalanyń damýy týraly máselege kelsek, oblys ortalyǵyn kórkeıtýge biz barynsha qoldaý jasap otyrmyz. Kóp sharýalar atqaryldy. Degenmen artylǵan mindetterdi oryndaýda sylbyrlyq bar. «Taldyqorǵan» ındýstrıaldy aımaǵyna ınvestorlar tartýmen túbegeıli aınalysý kerek degendi únemi aıtyp kelemin. Barlyq ınfraqurylymy tartylǵan, daıyn alań, tek bıznesmendermen sóılesip, múmkindikterin tanystyryp, jumys jasaý kerek. Kottedj qalashyǵyn, qaladaǵy kóp qabatty úılerdiń aýlalaryn abattandyrýda da baıaýsyńdar. Naýryzda qoǵamdyq qatynasqa jańa avtobýstar ákelinedi, al oǵan arnalǵan AZS-tyń qurylysy qaı deńgeıde, ony da qadaǵalamaısyńdar. Qar tazalaýda da jumystaryń tyndyrymdy emes, - dep birqatar salalar boıynsha qala ákimdiginiń jumysyn synǵa aldy. Amandyq Batalov Taldyqorǵan ákimdigine jasaǵan syn-eskertpeleri negizinde arnaıy jospar-baǵdarlama túzip, onyń oryndalýy boıynsha arnaıy esep berýlerin tapsyrdy. Sol sııaqty tıisti basqarmaǵa kottedj qalashyǵynda týyndap otyrǵan gaz tólemi máselesin jyldam arada sheshýdi mindettedi.
«Taldyqorǵan qalasy – oblys ortalyǵy. Munda qalany damytýdyń naqty konsepsııasy, aıqyn jospary bolýy kerek. Birinshi kezektegi máseleler, basymdyq beriletin baǵyttar, basqa, basqa da. Sonyń bárin aıqyndap, aıtylǵan eskertýlerdi engizip, naqty baǵdarlama jasap, bekitip, onyń oryndalýy jaıly maǵan baıandaıtyn bolasyńdar», dedi A.Batalov.
Budan keıin oblys ákimi qala turǵyndary tarapynan ózine qoıylǵan jylytý qazandyqtaryn tabıǵı gazǵa kóshirý, balalarǵa arnalǵan saýyqtyrý lagerin ashý, «Jastar - 2» shaǵyn aýdanyna gaz jáne káriz júıelerin tartý sııaqty suraqtarǵa naqty jaýaptar berdi.