Bıyl jyr alyby Jambyl Jabaevtyń týǵanyna 175 jyl tolmaq. Osy oraıda elimizde júz jasaǵan aqynnyń mereıtoıyn atap ótý sharasy qolǵa alyndy. Rýhanııat pen mádenıet salasyndaǵy ilkimdi is Almaty oblysynan bastaý almaqshy. Ári bul aqynnyń kindik qany tamǵan Jetisý óńiri úshin úlken jaýapkershilik bolyp otyr.
Jambyl jylynyń mejesinde atqarylar jumystyń bir parasyn baǵamdap, aqyn týǵan aýdandaǵy mereıtoıǵa daıyndyqty pysyqtaý úshin Almaty oblysyna Memlekettik hatshy Qyrymbek Kósherbaev keldi. Onyń jumys sapary Jambyl Jabaevtyń ádebı-memorıaldy mýzeıinen bastaldy. Qonaqtar aldymen mýzeı aldyna qoıylǵan aqynnyń eskertkishine gúl shoqtaryn qoıyp, taǵzym etti. Búginde jyr alybynyń ózi turǵan úı mýzeı retinde jabdyqtalǵan. Qyrymbek Kósherbaev mýzeıdiń ishki bólmelerin, aqynnyń tutynǵan buıymdaryn, mýzeı qabyrǵasyna jaǵalaı ilingen ómiri men tvorchestvosy týraly jádigerlerdi tamashalady. Al oblys ákimi Amandyq Batalov qonaqtarǵa ádebı mýzeı keıingi jyldary keńeıtilip, qosalqy ǵımaratpen tolyqtyrylǵanyn aıtyp, mereıtoıǵa daıyndyq jumysynan habardar etti. Qurmetti qonaqtarǵa jańadan basylǵan Jambyl men Muqaǵalıdyń jyr kitaptaryn syıǵa tartty. Budan keıin qonaqtar Jambyldyń rýhanı ustazy Súıinbaı Aronulynyń jáne kompozıtor ári dırıjer Nurǵısa Tilendıevtiń máńgilik mekenine baryp, arýaqtarǵa táý etti.
– 28 aqpan – jyr alybynyń týǵan kúni. Sonyń qarsańynda mereıtoılyq is-sharalar Nur-Sultan qalasynda bastalyp, Qazaqstannyń barlyq óńirinde jáne shetelde jappaı ótetin bolady. Búgin biz Elbasynyń jáne Prezıdenttiń tapsyrmalarymen Almaty oblysyna arnaıy kelip, Jambyl atamyzdyń basyna táý etip, is-sharalardyń alǵashqy qadamyn bastap otyrmyz. О́tken jyly hakim Abaıdyń 175 jyldyǵyn atap ótsek, bıyl Jambyl babamyzdyń mereıtoıy. Ekeýi de bir dáýirde, bir zamanda ómir súrgen – alyptar. Jambyl aqyndy aıtys óneriniń shyńynda tur desek, onyń sondaı bıikke órleýine yqpal etken, ózi «pirim» deıtin – Súıinbaı Aronuly. Sondyqtan XXI ǵasyrdyń túrli ún qatýlaryna laıyqty jaýap berý úshin biz osyndaı úlken sabaqtastyq pen ıgi dástúrdi jalǵastyra otyryp, ózimizdiń rýhanı bastaýlarymyzdy, uly tulǵalarymyzdy tanyp-bilýimiz kerek, – dedi sapar barysynda Memlekettik hatshy Qyrymbek Kósherbaev.
Jalpy, Jetisý óńiri Jambyl Jabaevtyń mereıtoıyna baılanysty birqatar is-shara josparyn ázirlep otyr. Onyń ishinde aqyn týraly bıografııalyq fılmniń túsirilimi, ómiri men shyǵarmashylyǵyna qatysty kitaptar shyǵarý, aqyndar aıtysyn ótkizý, mádenı eskertkishter ornatý, sýretshilerdiń halyqaralyq plenerin ótkizý sııaqty aýqymdy mindetter atqarylmaq.
Sondaı-aq Qazaqstan Respýblıkasynyń Memlekettik hatshysy Qyrymbek Kósherbaev Almaty oblysyna jumys sapary aıasynda óńirdegi «Rýhanı jańǵyrý» baǵdarlamasynyń júzege asý barysymen tanysty. Qarasaı jáne Jambyl aýdandaryndaǵy birqatar áleýmettik-mádenı nysandy aralaýǵa Memlekettik hatshymen birge Almaty oblysynyń ákimi Amandyq Batalov, Almaty qalasynyń ákimi Baqytjan Saǵyntaev, Mádenıet jáne sport mınıstri Aqtoty Raıymqulova, Jazýshylar odaǵynyń tóraǵasy Ulyqbek Esdáýlet te qatysty.
Qonaqtar aldymen Úshqońyr aýylynda ashylǵan Qazaqstan Respýblıkasy Tuńǵysh Prezıdenti – Elbasynyń «Atameken» tarıhı-mádenı ortalyǵyna atbasyn tiredi. Munda Elbasy Nursultan Nazarbaevtyń Qazaqstannyń Táýelsizdik jolyndaǵy tarıhı rólin aıshyqtaıtyn mýzeı ekspozısııalarymen tanysty. Mýzeıdiń arnaıy tilek kitapshasyna Memlekettik hatshy óz qoltańbasyn qaldyrdy. Kelesi kezekte Memlekettik hatshy «Rýhanı jańǵyrý» baǵdarlamasy aıasyndaǵy «Týǵan jer» jobasymen salynǵan «Úshqońyr» dene shynyqtyrý-saýyqtyrý kesheninin aralap, kórdi.
Almaty oblysy