Qazaq jáne álem ádebıetiniń jaýharlaryn, zamanaýı ádebı-tanymdyq týyndylardy qazaq tilinde tyńdaýǵa múmkindik beretin jańa mobıldi qosymsha oqyrmanǵa jol tartty.
Ádebıetsúıer qaýymdy qýantqan jobaǵa «QazAqparat» halyqaralyq aqparat agenttigi uıytqy bolyp otyr. «Tynda» mobıldi qosymshasy «Klassıkalyq proza», «Klassıkalyq poezııa», «Dala daýysy», «Abaı álemi», «Álemdik klassıka» atty tańdaýly toptamalar men «Roman», «Hıkaıat», «Áńgime», «Esse», «Balalar ádebıeti», «Satıra», «Poema», «О́leń», «Pesa» jáne ózge de janrlardan turady.
Osy oraıda Aqparat jáne qoǵamdyq damý mınıstri Aıda Balaeva aqparattyq tehnologııa qaryshtap damyǵan qazirgi zamanda kitap oqýǵa degen qyzyǵýshylyqtyń azaıa bastaǵanyn, sondyqtan bul jańa joba osy olqylyqtyń ornyn toltyrýǵa óz deńgeıinde yqpal etetinin jetkizdi.
«Internet pen tehnologııanyń damýy jáne onyń kúndelikti ómirimizge dendep enýi – bizdi keıbir burynǵy ádetterden alystatyp jatqany jasyryn emes. Solardyń biri – kitap oqý daǵdysy desek qatelespeımiz. Zertteýlerge sensek, sońǵy jyldary búkil álemde kitap oqýǵa qyzyǵýshylyq azaıa bastapty. Degenmen, tehnologııa qansha damysa da, bilimniń qaınary – kitapta ekendigimen eshkim daýlasa qoımas. Sondyqtan biz adamdar kitap oqymaıdy dep kiná artqannan, jańa zamanǵa beıimdelgen naqty sharalardy qolǵa alýymyz kerek. Bul rette, «QazAqparat» halyqaralyq aqparat agenttigi iske qosqan «Tynda» mobıldi qosymshasy osy olqylyqtyń ornyn toltyrady dep senemin», dep jazdy A.Balaeva Facebook paraqshasynda.
Mınıstr jańa joba kitapsúıer qaýymnyń ýaqytyn únemdep, súıikti týyndysyn jyldam ári ońaı tabýǵa múmkindik beretinin alǵa tartty.
Mobıldi qosymshany dál qazir Play Market jáne App Store jelisinen júkteýge bolady, sondaı-aq elektrondy jáne aýdıokitaptardy onlaın-oflaın nusqada oqyp, tyńdaýǵa múmkindik bar.
Al unaǵan kitaptardy «Meniń kitaptarym» bólimine saqtap, «Meniń sórelerim» bóliminde jeke kitaphana jasaqtaýǵa bolady eken. «Oqylym statıstıkasy» bóliminde apta, aı nemese jyl boıy oqylǵan kitaptyń better sany, oqý jyldamdyǵy men oqý ýaqytynyń statıstıkasy kórsetiledi. «Aıdyń jańa kitaptary», «Sizge unaýy múmkin», «Kóp izdelgen» sııaqty aıdarlardan oqyrman men tyńdaýshy jańa ári suranystaǵy kitaptardy taba alady.
Ataýly joba tól ádebıetimizdi nasıhattaýdy bir ǵana tetikpen júzege asyrýdy, jańa shyǵarmany, kitapty jyldam ári ońtaıly jolmen taratýdy, kitapqumar oqyrmannyń ýaqytyn únemdeýdi kózdeıdi. Bul qosymsha kórkem shyǵarmalardyń kókjıegin keńeıtip qana qoımaı, qazaq tilindegi kontenttiń damýyna úles qosady.