Nur-Sultan qalalyq memlekettik arhıvi eki el arasyndaǵy mádenı baılanystyń mańyzdylyǵyn arttyrý maqsatynda Reseı Federasııasy Ýlıanov oblysynyń jańa tarıhy memlekettik arhıvimen ózara áriptestik týraly kelisimge qol qoıdy, dep jazady Egemen.kz
Arhıv salasynyń áýre-sarsańy kóp desek te, keıingi jyldary qordalanyp jatqan máseleler birtindep sheshimin taýyp keledi. Baıyrǵy muraǵattardyń búgingi kelbetin syzý úshin, ótken dáýirdiń terezesinen taǵy bir qaraýǵa tıispiz.
Mundaǵy maqsat – eki jaqtyń múmkindikteri men ǵylymı-zertteý qyzmetterin tıimdi paıdalaný, mádenı murany saqtaý, eldiń tarıhyna, mádenıetine jáne turmys jaǵdaıyna qatysty qoljazbalar men sırek kitaptardyń qundylyǵyn anyqtaý. Sonymen qatar katalogtendirý, qoljazba baspalary, lıtografııa, bettik baspa, sıfrly kóshirmeler men qoljazbalardy qoldaný jáne qaıta qalpyna keltirý jumystaryna qatysý maqsatynda mamandarmen almasý oıǵa alynǵan. Osyǵan sáıkes kelisimshart aıasynda uzaq jáne qysqa merzimdi taǵylymdamadan, oqý-óndiristik jáne ǵylymı tájirıbeden ótý jáne zertteýshilermen kásibı tájirıbeler almasý kózdelgen.
– Jańa bastamalar jarqyn iske jolashar bolmaq. Elbasy Nursultan Nazarbaevtyń «Uly Dalanyń jeti qyry» maqalasynan týǵan ıdeıalardy birtindep júzege asyryp jatyrmyz. Búginde El Prezıdenti Qasym-Jomart Toqaev ta arhıv salasyna erekshe kóńil bolyp otyr. Bul yntymaqtastyq ótken zamannyń aq-qarasyn ajyratyp, ulylardyń eńbegimen qaıta qaýyshýǵa múmkindik bermek, – deıdi qala arhıviniń dırektory Meıram Bektembaev.
Eki tarap ǵylymı konsýltanttardy tartý arqyly ǵylymı-praktıkalyq zertteýler júrgizý josparlanyp otyr. Taraptar birikken konferensııalar, semınarlar, sımpozıýmdar, dóńgelek ústelder uıymdastyryp, basqa da uqsas ǵylymı sharalar jáne ózge de bastamalardy júrgizedi. Árıne, munyn bári aldaǵy ýaqyttyń enshisindegi dúnıeler.
Bul tarıhı ýaǵdalastyq ǵylymı zertteý salasyndaǵy rýhanı-mádenı jáne halyqaralyq máselelerdi birlesip sheshýdegi eki uıym arasyndaǵy baılanysty nyǵaıtady.