Alǵys aıtý kúnine oraı Qazaqstan Respýblıkasynyń Tuńǵysh Prezıdenti – El basy kitaphanasynda «Myń alǵys saǵan, Uly dalam!» halyqaralyq dóńgelek ústel ótti.
Is-sharaǵa qatysýshylardy merekemen quttyqtaǵan Elbasy kitaphanasynyń dırektory Baqytjan Temirbolat ishki saıasat strategııasynyń negizgi baǵytyna aınalǵan qoǵamdaǵy turaqtylyqtyń saqtalýyna Tuńǵysh Prezıdentimiz N.Á.Nazarbaevtyń qosqan úlesin aıtyp ótti.
– «Qazaqty qasıetti qara shańyraqqa balasaq, elimizdegi barsha etnos – sol shańyraqqa shanshylǵan ýyqtar», deıdi Elbasy. Qazaqstan halqy qonaqjaılyq pen darqan minezdiń, birlik pen berekeniń, turaqtylyqtyń, etnosaralyq jáne konfessııaaralyq tatýlyqtyń shynaıy úlgisin kórsetti. Sondyqtan da QHA-nyń 2016 jylǵy sessııasynda N.Nazarbaev Alǵys aıtý kúnin engizýdi usynyp, bul kúnniń «barlyq qazaqstandyqtyń bir-birine degen meıirimi men dostyǵynyń, súıispenshiliginiń jarqyn merekesi» bolatynyn alǵa tartqan edi, – dedi B.Temirbolat.
Qazaqstandyqtardy merekemen quttyqtaǵan Ingýshetııanyń birinshi prezıdenti, memleket jáne qoǵam qaıratkeri Rýslan Aýshev is-sharaǵa qatysýshylarǵa jyly lebizin bildirdi.
– Osydan 77 jyl buryn stalındik qýǵyn-súrgin saldarynan cheshender men ıngýshtar týǵan jerlerinen Qazaqstan men Ortalyq Azııaǵa májbúrli túrde kóshirildi. Osy bir qıyn-qystaý kezeńde qazaqtar ózderi ilinip-salynyp áreń júrse de bizdiń halqymyzǵa tirek bolyp, ondaǵan myń cheshen-ıngýsh otbasyn qutqardy», dedi ol.
Is-shara barysynda Qazaqstannyń memleket jáne qoǵam qaıratkeri, QHA Keńesiniń múshesi, Dúnıejúzilik cheshender kongresiniń vıse-prezıdenti Ahmed Mýradov, ALJIR tutqyndarynyń nemereleri, kınorejısser – Darıa Vıolına men Natalıa Grıgoreva, sondaı-aq Polshanyń Gdansk qalasyndaǵy Ekinshi dúnıejúzilik soǵys mýzeıiniń bas mamany Dmıtrıı Panto sóz sóıledi.
Is-sharaǵa otandyq jáne sheteldik ǵalymdar, ultaralyq qatynastar salasyndaǵy zertteýshiler, sarapshylar, etnomádenı birlestikterdiń ókilderi qatysty.