Qaraǵandy oblysynda koronavırýs ınfeksııasyna qarsy vaksınany alǵashqylardyń biri bolyp medısına qyzmetkerleri alǵan bolatyn. Keıbir málimetterge qaraǵanda, búginge deıin 2 400 dáriger egilipti. Onyń ishinde eki quramdas bólikti alǵan 704 qyzmetkerge vaksınalaý tólqujaty tapsyrylǵan.
Al naýryz aıynyń 3-inen óńirdiń muǵalimderi vaksınalaýdan óte bastady. Eskerte ketetin bir jaıt, bul is-shara erikti jáne tegin túrde júzege asyrylyp jatyr.
Qaraǵandy oblystyq qoǵamdyq densaýlyq saqtaý qyzmetiniń basshysy Bıbigúl Tólegenovanyń aıtýyna qaraǵanda, óńirde vaksına ekkizgisi keletin muǵalimderdiń sany 6 200 adamdy quraıdy. Ekpe salý barysynda pedagogterdi qoldanystaǵy vaksınalaý ortalyqtaryna tizim boıynsha bólip, is-shara arnaıy qurylǵan keste boıynsha júzege asyrylady. Alǵashqylardyń biri bolyp ekpe saldyrǵan muǵalim Varvara Dydyshko Qanysh Sátbaev atyndaǵy gımnazııada jumys isteıdi. Ol vaksınalaýdy pandemııany toqtatatyn birden-bir preparat sanaıtyndyqtan, mundaı qadamǵa sanaly túrde jáne esh kúmánsiz barǵanyn aıtady.
– Biz, muǵalimder, bul sharany qajet dep sanaımyz. О́z basym reseılik «Spýtnık V» vaksınasyna senemin. Novosibirde jaqyn dosym ǵylym salasynda jumys isteıdi. Ol vaksınalaýdan alǵashqylardyń biri bolyp ótti jáne onyń boıynan asqynýlar baıqalǵan joq, – deıdi qaraǵandylyq muǵalim.
Pedagog mamandardan keıin sáýir aıynda kúshtik qurylymdardyń qyzmetkerleri vaksına alýdy bastaıdy. Al mamyrdan bastap ekpe alýǵa erikti túrde nıet bildirgen turǵyndardy jappaı vaksınalaý josparda bar.
Qaraǵandy oblysy