Qazaqtyń kórnekti qalamgeriniń biri – Maqsut Netalıev. Oıly oqyrmanyna jıyrmaǵa jýyq jyr kitabyn usynǵan aqynnyń kópshilikke beımálim bir qyry bar. Qalamger 1952-1957 jyldary mektepte jumys istep, shákirt tárbıeleý isine úles qosqan. Sol kezde aq qaǵazǵa óleń joldaryn órgen qalamymen birge skrıpkany janyna serik etken eken.
Qazir qalamgerdiń skrıpkasy kindik qany tamǵan Isataı aýdanyndaǵy mýzeıde saqtaýly tur. Mýzeı qyzmetkeri Ázıza Hamzınanyń aıtýynsha, Maqsut Netalıev 1956-1957 jyldary respýblıkalyq festıvaldarǵa qatysyp, skrıpkamen kıeli sahnada ónerin kórsetipti. Túrli marapattarǵa da ıe bolypty.
– Aqyn tabıǵattyń ásemdigine, qorshaǵan ortaǵa oıly kózben qarap, ádemi de áserli sátterdi óleńmen órnektep qana qoıǵan joq. Qalam qýatymen birge, qolynan tastamaǵan skrıpkanyń sazdy áýenimen tyńdaýshysyn elite bilgen ǵoı. Qazir sol skrıpkasy aýdandyq mýzeıdiń qundy jádigeriniń birine aınaldy, – deıdi Ázıza Hamzına.
Onyń aıtýynsha, mýzeıde aqynnyń budan ózge de birneshe jádigeri bar. Sonyń biri – únemi ózimen birge ala júretin fotoapparaty.
Atyraý oblysy