Atyraýda 9 naýryzdan beri muǵalimderge koronavırýs ınfeksııasyna qarsy vaksına salý bastaldy. Máselen, sońǵy úsh kúnde 605 atyraýlyq vaksına aldy. Onyń ishinde 408 pedagog, 183 medısına qyzmetkeri, 14 memlekettik qyzmetshi bar.
Qazir óńirde bilim salasynyń qyzmetkerleri arasynda koronavırýsqa qarsy vaksınaǵa qatysty túsindirý jumystary júrgizilip jatyr. Qaýipti vırýsqa qarsy reseılik «Spýtnık V» vaksınasyn alǵashqylardyń qatarynda oblystyq bilim berý basqarmasy basshysynyń orynbasary Aınagúl Dúısekenova, Atyraý qalasyndaǵy №16 Qarajigitov atyndaǵy orta mekteptiń dırektory Almabek Abdolov, № 20 Pýshkın atyndaǵy orta mektep-lıseıiniń dırektory Gúlnar Qojahmetova, Atyraý qalalyq bilim bólimi basshysynyń orynbasary Qaırat Qýanyshev pen IT mektep-lıseıi dırektorynyń orynbasary Aıgúl Seıitova saldyrdy.
– Kez kelgen indetten qorǵanýdyń, aldyn alýdyń birden-bir joly – vaksına. Buǵan deıin oblystyq densaýlyq saqtaý basqarmasy men emhanalardyń qyzmetkerleri koronavırýs ınfeksııasyna qarsy ekpeniń paıdasy, onyń áseri týraly aqparattar berdi. Mundaı vaksına qaýipti vırýstan qorǵaıdy. Ekpe alǵan soń qorqynyshsyz júrýge bolady. О́zimniń saýlyǵym, jaqyndarymnyń amandyǵy úshin vaksına aldym, – deıdi oblystyq bilim berý basqarmasy basshysynyń orynbasary Aınagúl Dúısekenova.
Onyń aıtýynsha, qazir bilim berý salasynda 11 myńnan astam adam jumys isteıdi. Solardyń qataryndaǵy №16 Qarajigitov atyndaǵy orta mekteptiń dırektory Almabek Abdolovtyń pikirine súıensek, muǵalimder eldiń keleshektegi órkendeýine úles qosatyn jas býyn ókilderimen tyǵyz baılanys jasaıdy. «Sol sebepten, «Spýtnık V» vaksınasyn erikti túrde saldyrýǵa bekindim. О́ıtkeni, birinshiden, ózimniń de, jaqyndarymnyń da saýlyǵyn oıladym. Ekinshiden, mektep oqýshylaryna qaýipti vırýsty tasymaldaýshy bolǵym kelmeıdi. Vaksına saldyrǵannan keıin janama áseri baıqalǵan joq» deıdi ol.
H.Dosmuhamedov atyndaǵy Atyraý memlekettik ýnıversıtetiniń rektory Salamat Idrısov ta osyndaı pikirdi ustanady. Ol ózi basqaratyn ýnıversıtettiń 20 qyzmetkerimen birge vaksına saldyrdy.
– Halqymyzda «Birinshi baılyq – densaýlyq» dep tegin aıtpaǵan ǵoı. Qaýipti vırýstyń qaýpin vaksına alýmen ǵana tejeı alamyz. Sondyqtan vaksına saldyrý arqyly ózimniń ǵana emes, otbasym men áriptesterimniń de saýlyǵyn saqtaýǵa úlesimdi qosýdy kózdedim. Sol maqsatpen №1 qalalyq emhanada vaksınanyń birinshi dozasyn qabyldadym. Vaksınadan soń janama áser baıqalmady. Ekinshi dozadan 21 kún ótken soń saldyramyn, – deıdi S.Idrısov.
Degenmen, óńirde áli de epıdemııalyq ahýal turaqtalar emes. Máselen, oblystyq sanıtarııalyq-epıdemıologııalyq baqylaý departamentiniń basshysy – bas sanıtar dáriger Mádenıet Tanaýovtyń málimetine súıensek, byltyrǵy 28 naýryzdan bıylǵy 11 naýryzdy qosa alǵanda koronavırýs ınfeksııasyn juqtyrǵan 17 582 derek tirkelip otyr. Onyń ishinde qaýipti vırýsqa shaldyqqan 14 jasqa deıingi 662 bala bar. Sondaı-aq, 18 jasqa tolmaǵan 300 jasóspirimde de koronavırýs anyqtalypty.
– О́tken jylǵy naýryzdan beri medısına salasynyń 1 073 qyzmetkeri qaýipti vırýsqa shaldyqty. Arnaıy komıssııanyń sheshimimen 777 qyzmetkerge 2 mln teńge kóleminde ótemaqy tólendi. О́kinishke qaraı, 14 medısına qyzmetkeri kásibı mindetin oryndaý kezinde koronavırýs ınfeksııasyn juqtyrǵannan qaıtys boldy. Qaýipti vırýstan qaıtys bolǵan áriptesterimizdiń týystaryna 10 mln teńgeden astam ótemaqy tólendi, – deıdi oblystyq densaýlyq saqtaý basqarmasynyń basshysy Ashan Baıdýálıev. – Munaı kompanııalarynyń demeýshilik kómegimen 60 mln teńgeniń materıaldyq kómegi kórsetildi. Bul qarjy arnaıy komıssııanyń sheshimimen 260 medısına qyzmetkerine tólendi.
Al bas sanıtar dáriger M.Tanaýov óńir turǵyndaryn epıdemııalyq ahýal turaqtalǵanǵa deıin adamdar kóp shoǵyrlanatyn jerge barmaýǵa shaqyrdy. Buǵan Atyraýdaǵy epıdemııalyq ahýaldyń áli de turaqtalmaı, kúrdelene túsýi sebep bolyp otyr. Sol sebepten, áleýmettik araqashyqtyqty, medısınalyq betperde taǵý rejimin ustaný saqtala beredi. Adamdar kóp jınalatyn jerge barmaýǵa da keńes berildi.
– О́ńirde kún saıyn koronavırýs ınfeksııasyn juqtyrý deregi azaımaı otyr. 14 naýryzda Kórisý merekesi bastaldy. Odan soń Naýryz merekesi de jaqyndady. Osyǵan baılanysty turǵyndarǵa jasy úlken adamdardy telefonmen, vıdeoqońyraý shalý arqyly quttyqtaýǵa keńes berdik. О́ıtkeni, jasy úlken qarııalar qaýipti vırýs juqtyrý múmkindigi basym topqa jatady. Ondaı adamdardyń kópshiliginde sozylmaly syrqaty bolýy múmkin, – deıdi bas sanıtar dáriger. – Sol sebepten, árkim aldymen óziniń, aǵaıyn-týysynyń saýlyǵyn saqtaýdy oılaǵany jón. Árıne, ejelden kele jatqan Kórisý merekesinde úlkenderdi syılaý, olarǵa qurmet kórsetip, izet tanytý sekildi qundylyqtardy joǵaltpaýymyz qajet-aq. Alaıda ár áýlettegi syıly qarııalardyń aman júrgenin qalaıtyn bolsaq, bul joly olarǵa arnaıy baryp, qol berip kórisýdi ázirge qoıa turǵannyń sókettigi joq. Jasy úlken adamdar telefonmen, vıdeoqońyraýmen quttyqtaǵandy túsinistikpen qabyldaıdy dep oılaımyn. Qazirgi epıdemııalyq ahýal bizdi osyndaı qadamǵa barýǵa májbúr etip otyr.
Oblystyq densaýlyq saqtaý basqarmasy baspasóz qyzmetiniń málimetinshe, qazir óńirdegi jeti aýrýhanada ortalyqtandyrylǵan ottegi stansasy jumys istep tur. Onyń ekeýi Qurmanǵazy men Qyzylqoǵa aýdanynda iske qosyldy. Buǵan qosa Atyraý qalasyndaǵy oblystyq perınataldyq jáne kardıologııalyq ortalyqtarda, oblystyq aýrýhana men №2 ınfeksııalyq, sondaı-aq byltyr ashylǵan modýldi ınfeksııalyq aýrýhanada ottegi stansasy bar. Endi segizinshi ottegi stansasy Inder aýdandyq aýrýhanasynda jumys isteı bastady. Aldaǵy ýaqytta Jylyoı aýdanynyń ortalyǵy – Qulsary qalasynda salynyp jatqan modýldi ınfeksııalyq aýrýhanaǵa da ottegi stansasyn ornatý josparlanyp otyr.