О́z basym Memleket basshysy Qasym-Jomart Toqaevtyń jerdi sheteldikterge satpaý jáne jalǵa bermeý maqsatynda qabyldaǵan sheshimin óte oryndy jáne ýaqtyly qolǵa alynǵan isterdiń biri dep sanaımyn. Jer taǵdyry – kez kelgen qazaqtyń jandy jeri.
Sol sebepti men Prezıdenttiń zań shyǵarýǵa bastamashylyq etý quqyn tolyq paıdalanyp, osyndaı sheshim shyǵarýyn tolyǵymen qoldaımyn.Qazaqta «Ultaraqtaı bolsa da, atameken jer qymbat» degen ulaǵatty sózi bar. Osynaý keń-baıtaq qasıetti jer bizdiń ata-babamyzdyń qanymen, janymen qorǵap qalǵan dúnıesi. Qansha dúnıe saýdaǵa túsip, satylǵanymen, jer ol – halyqtyń máńgilik qazynasy.
Sondyqtan da ony satýǵa eshkimniń de quqy joq. Alaqandaı jer bolsa da ol bizdiń, Qazaq eliniń enshisindegi qundylyq bolyp qalýy kerek. Qazaqtyń jerinde ózimizdiń urpaqtarymyz ıe bolyp qalý kerek, osy jerde óz perzentterimiz eńbek etip, ósip-ónýi, ómir súrýi qajet.
El egemendiginiń eń basty qazynasy – jerdi kózimizdiń qarashyǵyndaı saqtap, erteńge amanat etip qaldyrý – memlekettiń júgin arqalaǵan azamattardyń búgingi basty mindeti, mine, osy. Shyndap kelgende, bul – kıeli qazaq topyraǵynda kindik qany tamǵan árqaısysymyzdyń qasıetti paryzymyz. О́ıtkeni jerdiń taǵdyry – eldiń taǵdyry.
Ákim YSQAQ,
qoǵam qaıratkeri