Máýlen Áshimbaevtyń tóraǵalyq etýimen Senat janyndaǵy Jergilikti ókildi organdarmen (máslıhattarmen) ózara is-qımyl jónindegi keńestiń otyrysy boldy. Onlaın túrinde ótken otyrysqa Palata depýtattary, memlekettik organdardyń basshylary jáne elimizdiń barlyq óńirlerinen máslıhat ókilderi qatysty.
Senat Tóraǵasy óz sózinde Memleket basshysynyń reformalaryn jańǵyrtý jónindegi kún tártibin zańnamalyq turǵyda qamtamasyz etý týraly jan-jaqty aıtyp berdi. Ol asa mańyzdy zań jobalaryn qaraýǵa máslıhattar depýtattaryn belsendi túrde tartýǵa shaqyrdy. Senatorlardyń úshten ekisi aımaqtardan saılanǵanyn eskere kelgende mundaı tyǵyz qarym-qatynastyń mańyzy óte zor.
«О́tken saılaýda Elbasy men Memleket basshysynyń bastamasymen júrgizilip jatqan saıası reformalardyń áleýeti iske asyryldy deýge ábden bolady. Alǵash ret máslıhat depýtattary partııalyq tizim boıynsha saılandy. Áıelder men jastarǵa arnalǵan kvota da alǵash ret qoldanyldy. Saılaý nátıjesinde jergilikti ókildi organdar 70 paıyzǵa jańaryp, máslıhattardyń sapaly quramy qalyptasty», dedi Máýlen Áshimbaev.
Senat Tóraǵasynyń pikirinshe, Prezıdent bastamalarynyń tabysty iske asýy zańnamalyq bazanyń ózgerýine ǵana emes, halyqpen túsindirý jumystarynyń qanshalyqty sapaly júrgizilip jatqanyna da baılanysty. Sondyqtan Máýlen Áshimbaevtyń pikirinshe, máslıhattar men Senat osy baǵytta ózara belsendi is-qımyl jasaýy tıis.
«Senat depýtattary únemi aýdandyq, qalalyq, oblystyq máslıhattarmen ózara tyǵyz baılanysta bolýy kerek. Sonyń barysynda jergilikti deńgeıdegi ózekti máseleler jáne qoldanystaǵy zańnamanyń tıimdiligi talqylanady. Nátıjesinde biz halyqty tolǵandyrǵan máselelerdi anyqtap, olardy sheshýdiń tıimdi joldaryn qalyptastyratyn bolamyz. Jumysymyzdaǵy mańyzdy baǵyttardyń taǵy biri halyqqa Memleket basshysynyń saıasatyn jáne qabyldanǵan zańdardyń máni men mańyzyn túsindirý», dedi Máýlen Áshimbaev.
Otyrysta Ulttyq ekonomıka mınıstri Áset Erǵalıev te sóz sóıledi. Ol «Qazaqstan Respýblıkasynyń keıbir zańnamalyq aktilerine aýdandyq, qalalyq jáne aýyldyq bılik deńgeıleriniń derbestigi men jaýapkershiligin keńeıtý máseleleri boıynsha ózgerister men tolyqtyrýlar engizý týraly» zań jobasynda belgilengen jergilikti memlekettik jáne ózin-ózi basqarýdy damytýdyń negizgi tásilderine toqtaldy. Al máslıhat ókilderi jergilikti ókildi organdar qyzmetiniń negizgi aqparattyq-uıymdastyrýshylyq máseleleri týraly aıtyp berdi.