Bul týraly búgin Senat janyndaǵy Jergilikti ókildi organdarmen ózara is-qımyl jónindegi keńes otyrysynda belgili boldy. Máýlen Áshimbaevtyń tóraǵalyq etýimen ótken kezdesýde jergilikti memlekettik basqarýdyń rólin kúsheıtý jáne máslıhat pen Senat depýtattary arasyndaǵy yntymaqtastyqqa qarqyn berý máseleleri talqylandy.
«Senat depýtattary únemi aýdandyq, qalalyq, oblystyq máslıhattarmen ózara tyǵyz baılanysta bolýy kerek. Sonyń barysynda jergilikti deńgeıdegi ózekti máseleler jáne qoldanystaǵy zańnamanyń tıimdiligi talqylanady. Nátıjesinde biz halyqty tolǵandyrǵan máselelerdi anyqtap, olardy sheshýdiń tıimdi joldaryn qalyptastyratyn bolamyz», dedi Máýlen Áshimbaev.
Ulttyq ekonomıka mınıstri Áset Erǵalıev elimiz Prezıdentiniń ózin-ózi basqarýdy kúsheıtý jáne tıisti zań jobasy týraly tapsyrmalarynyń oryndalý barysy týraly Senat jáne máslıhat depýtattaryna aıtyp berdi.
«Saıası partııalar qatarynan óz múshelerin usyný, daýys berýge quqyǵy bar tıisti okrýg saılaýshylarynyń jalpy sanynan qol jınaý arqyly keminde 1% bolǵan jaǵdaıda ózin-ózi kandıdattyqqa usyna alady, eger usynylatyn kandıdat sany ekiden kem bolsa, onda aýdan ákimimen usyný qarastyrylǵan. Ákimderdi tikeleı saılaý ókilettik merzimderiniń aıaqtalýyna qaraı júzege asyrylady jáne jergilikti bıýdjet esebinen qarjylandyrylady. Aǵymdaǵy jyldyń ekinshi jartyjyldyǵynda tikeleı saılaý 836 ákimge tıisti bolady», dep atap ótti mınıstr óz sózinde.
Sonymen qatar Áset Erǵalıevtiń aıtýynsha, jergilikti jerlerdegi ákimdikterdiń bıýdjetin nyǵaıtý úshin olarǵa qosymsha salyqtar men tólemderdiń 4 túrin berý usynylady. Onyń ishinde, biryńǵaı jer salyǵy, jer ýchaskelerin paıdalanǵany úshin tólem, jer ýchaskelerin satýdan túsetin túsimder jáne jer ýchaskelerin jaldaý quqyǵyn satqany úshin tólem de bar.
Máýlen Áshimbaev kezdesýdi qorytyndylaı kelip, elimiz Prezıdentiniń osy jáne basqa da bastamalaryn iske asyrýdyń nátıjeli bolýy zańnamanyń ózgerýine ǵana emes, sondaı-aq jergilikti jerlerde zańdardyń qanshalyqty sapaly túsindiriletinine de baılanysty ekenin atap ótti.