Qoja Ahmet Iаsaýıdiń jıeni Júsip ataǵa qatysty shejireniń bir bóligi men arnaıy mór basylǵan qujattar tabyldy. Shaǵataı tilinde jazylǵan qoljazbanyń uzyndyǵy – 3,5 metr. Tarıhı jádigerdi Júsip atanyń urpaqtary atadan-balaǵa mıras etip, kózdiń qarashyǵyndaı saqtap kelgen.
HII ǵasyrda ómir súrgen Júsip ata kesenesi Túrkistan qalasynan 25 shaqyrym jerdegi Eski Iqan eldi mekeninde ornalasqan. Kesene eki bólmeden turady. Ońtústik shyǵysy – qabirhana. Úlken bólmesi zııarathana esebinde salynǵan. Oǵan dálel – mıhrab bolmaýy. Nysanǵa 2005 jyly arheolog M.Tuıaqbaev zertteý júrgizgen.
Seıdálim Iýldashev qarııanyń jeke muraǵatynan tabylǵan bul jádigerlerdi urpaqtary buǵan deıin birde jerge kómip, birde shatyrǵa jasyryp saqtap kelipti.
«8 jasymda atam, 18 jasymda ákem ómirden ótti. Bul zattardy atam ákeme, ákem maǵan amanattap ketti. Men tarıhshy emespin. Biraq mura bolyp saqtalyp bul dúnıelerdiń bir kúni suraýy bolatynyna senim arttym. Qyzyǵýshylyqpen jazbalardy oqı alatyn kisilerge kórsettim. Munda nasabnama emes, tarıh jazylǵan eken. Meniń uqqanym – Júsip ataǵa qatysty derekter, hannyń jarlyqtary, jer-sý ataýlary, halyqtyń tynys-tirshiligi jaıly málimetter bar. Qazirgi Shaǵa aýyly shejirede «Jaǵa» dep aıtylsa, Iqan aýyly sol kezdiń ózinde baý-baqshamen aınalysqanyn ańǵarýǵa bolady. Shejirede Júsip atamyz Iаsaýı babamyzǵa kele jatqan qonaqtardy qarsy alyp, 12 túrli júzim usynyp, kútip alǵany jaıly málimet kezdesedi. Bul derekterdi tolyqtaı zertteý ǵalymdardyń enshisinde», deıdi Seıdálim Nýrshıddınuly.