Premer-Mınıstr Asqar Mamınniń tóraǵalyǵymen ótken Úkimet otyrysynda eldegi sanıtarlyq-epıdemıologııalyq ahýal qaraldy, dep habarlaıdy Egemen.kz.
Qazirgi jaǵdaı, halyqty vaksınalaý barysy jáne Memleket basshysy Qasym-Jomart Toqaevtyń bergen tapsyrmalaryn oryndaý aıasynda qabyldanyp jatqan sharalar týraly densaýlyq saqtaý mınıstri Alekseı Soı, Almaty oblysynyń ákimi Amandyq Batalov, Aqtóbe oblysynyń ákimi Ońdasyn Orazalın, Aqmola oblysynyń ákimi Ermek Marjyqpaev baıandady.
Respýblıka boıynsha vırýstyń reprodýktıvtik kórsetkishi 1,15 quraıdy. Infeksııalyq tósek oryndarynyń júktemesi 41%, reanımasııalyq tósek oryndary – 27% quraıdy. Qazirgi ýaqytta Covid-19 taralý qarqyny boıynsha Nur-Sultan jáne Almaty qalalary, Batys Qazaqstan, Almaty, Atyraý, Aqtóbe, Aqmola jáne Qaraǵandy oblystary «qyzyl aımaqta» tur. Shyǵys Qazaqstan jáne Túrkistan oblystaryn qospaǵanda, qalǵan barlyq óńirler – «sary aımaqta».
«Memleket basshysy Qasym-Jomart Kemeluly Toqaev sanıtarlyq-epıdemıologııalyq jaǵdaıdy turaqtandyrý jáne vaksına alatyndardyń sanyn arttyrý boıynsha aldymyzǵa naqty mindet qoıdy», dedi A. Mamın.
Premer-Mınıstr ákimderge epıdemıologııalyq jaǵdaıǵa baılanysty jedel shekteý sharalaryn qabyldaýdy, barlyq emdeý mekemelerin dári-dármekter men medısınalyq buıymdardyń qajetti kólemimen tolyq qamtamasyz etýdi, sanıtarlyq normalar men maska taǵý rejımin saqtaýdy kúsheıtýdi tapsyrdy.
Densaýlyq saqtaý mınıstrligi men ákimdikterge tósek oryn qorynyń tolyq daıyndyǵyn qamtamasyz etý, sondaı-aq qoǵamdyq oryndardy, onyń ishinde saýda ortalyqtaryn paıdalana otyryp vaksınalaýdyń qoljetimdiligin qamtamasyz etý tapsyryldy.