– Orys halqynyń «Ah, Samara, gorodok» atty tamyljyǵan tamasha áni aıtylǵanda, onyń ásem áýeni men sulý sezimge toly sózine erekshe eltip, teńizdeı terbelgen kórermen kópke deıin Roza apamyzdy sahnadan jibermeı qoıdy, – dep bastady áńgimesin Erlan inimiz. – Onyń aldynda shyrqalǵan – «Aqmańdaılym», «Aqsuńqarym», «Ińkárim-aı», «Tań samaly» sııaqty ánderge de jurt uzaq qol shapalaqtap turyp alǵan bolatyn.
– Sonda bul qaı kezdegi, qaı jerdegi konsert edi?
– Aıtaıyn. 2006 jyldyń mamyr aıy. Almaty oblysynyń Qaskeleń qalasyndaǵy Qarasaı aýdandyq Mádenıet úıi. Qazaqtyń uly ánshisi, Halyq qaharmany, marqum Roza Baǵlanova jeke konsertin bergen.Sondaǵy jınalǵan eldiń kóptigi-aı, zalda ıne shanshar oryn joq, túregelip turǵandar da az emes edi. Halyqtyń súıikti ánshige, onyń ónerine degen shyn mahabbatyna, shynaıy qurmet-syıyna kýá boldym men sol kezde. Kýá bolyp qana qoımaı qyzmettik mindetime saı (aýdandyq «Zaman jarshysy» gazetiniń redaksııasyna fototilshi bolyp ornalasqanyma bir-eki jyl ótken) ol kisini birneshe ret sýretke de túsirdim.
– Al, myna sýrette Roza Tájibaıqyzymen óziń qatar tursyń ǵoı...
– Iá, onyń mán-mánisi bylaı. Konsert aıaqtalǵannan keıin el aldyna shyǵýǵa daıyndalatyn bólmesine kelip: «Roza apa, men de sizben sýretke túseıinshi» dedim uıalsam da batylym jetip. Aldynda sýretke túsirip júrgen meni jaqsy baıqap qalǵan bolýy kerek, jaıdarylana kúlip: «Kel, kele ǵoı, aınalaıyn!» degeni. Sondaǵy qatty qýanǵanym-aı! Mynaý sol sýret edi. Bul – meniń eń qymbat qazynamnyń birindeı, sondyqtan úıimniń tórinde ilýli tur.
Erlan Bolatuly Álıasqarov áli kúnge deıin atalǵan aýdandyq gazette isteıdi, oblystaǵy myqty fototilshiniń biri. Qazaqstan Jýrnalıster odaǵynyń múshesi, Aqparat jáne qoǵamdyq damý mınıstrligi Qurmet gramotasynyń ıegeri. 2020 jyly Almaty oblysy ákiminiń «Samǵaý» jýrnalıster baıqaýynyń «eń úzdik fototilshi» atalymy boıynsha bas júldeni jeńip alǵan.
Berikbaı QADYQOV,
jýrnalıst
Almaty oblysy,
Qarasaı aýdany