Qasıetti Ramazan aıynda Nur-Sultan qalasyndaǵy muqtaj otbasylarǵa azyq-túlik sebetterin taratý isi jalǵasyp jatyr, dep habarlaıdy Egemen.kz elorda ákimdiginiń resmı saıtyna silteme jasap.
Nur-Sultanda «Qaıyrymdy ister» marafony aıasynda qasıetti Ramazan aıynda tórt myńnan astam áleýmettik az qamtylǵan otbasyǵa azyq-túlik sebeti tapsyrylady. Qaıyrymdylyq is-sharany Nur-Sultan qalasy ákimdiginiń uıytqy bolýymen uıymdastyrylyp otyr. Al aksııany «Halyk Bank» AQ, Bolat О́temuratov qory jáne t.b. qoldady.
Aıta keteıik, bıyl Naýryz merekesi «Qaıyrymdy ister» marafonynyń aıasynda ótti. Naýryz aıynda tórt myń muqtaj otbasyǵa azyq-túlik jıyntyǵy tapsyryldy. Qaıyrymdylyq isti júzege asyrýǵa kásipkerler, iri uıymdar, eriktiler jáne qala turǵyndary atsalysty. Pandemııa kezinde dári-dármekterdi, medısınalyq maskalardy taratý, zeınetkerlerdiń aýlalarynyń qaryn kúreý, aǵash otyrǵyzý jáne t.b. jumystar júrgizildi.
Sol sııaqty qasıetti aıdy Nur-Sultan qalasynyń Din isteri jónindegi basqarmasy men dinderdi zertteý ortalyǵy «Nur-Astana» meshiti ujymymen birlesip, aýzy berik musylmandarǵa ystyq tamaq taratýmen bastaǵan.
Esterińizge sala keteıik, Nur-Sultan qalasynyń ákimi Altaı Kólginov bıznesmenderdi, iri kásiporyndardyń basshylary men top-menedjerlerdi qaıyrymdylyq aksııalaryna qatysýǵa shaqyrdy. Atalǵan is-sharalar aldaǵy ýaqytta da jalǵasatyn bolady.